E evento, cu hopi hende ta considera manera e Met Gala di Aruba, ta e fiesta anual di gala pa recauda fondo di Kiwanis Club of Aruba. Un evento cu sigur a haci falta den e luna di september, cu door di e pandemia no por a tuma luga manera tur aña. Un fiesta cu a sobresali semper p’e ambiente unico y elegancia, cu ta combina cu e tema di e anochi. E combinacion semper ta perfecto, pa tur hende na e evento aki por a disfruta di un experiencia excepcional. For di e entrada di Renaissance Convention Center, despues ora di drenta paden den e sala ta wordo transforma esplendidamente cu glamour, elegancia y sofisticacion. Pa locual ta e parti di entretenimento, cu tres banda y un DJ, a percura pa pone tur aña un ambiente sin igual.
