E aña aki Rey Willem-Alexander y Reina Máxima a cancela e biahe, cu nan ta haci tur aña pa Argentina pa pasa Pasco despues di e reciente polemica. Den e siman cu a pasa media hulandes a informa cu e rey y reina a cancela nan vakantie na e pais natal di Máxima. Segun e coresponsal di realesa, Marc van der Linden, a bisa den e programa RTL Boulevard, cu e famia real hulandes no lo haci e biahe y a cambia di plan pa pasa e dianan di fiesta na e Paleis Het Loo na Apeldoorn.
Paleis Het Loo
Villa na Peloponnese-Grecia
Willem-Alexander y Máxima a tuma e decision aki pa evita critica, manera cu nan a experencia algun siman pasa despues di a haci un biahe hunto cu nan tres yiunan, e prinsesnan Amalia, Alexia y Ariane pa Grecia, unda nan tin un villa situa na Peloponnese. Y aunke den teoria nan no tabata haci nada inapropia, e biahe aki a causa un polemica grandi door cu un dia prome di e biahe gobierno hulandes a decreta lockdown parcial, ademas di haci un peticion na e ciudadanonan pa evita mas posibel pa sali.
Door di e escandalo e reynan a haya nan obliga pa bolbe di nan vakantie mas prome y incluso a pidi un disculpa publico a traves di un video, cu nan a comparti riba e rednan social di Cas Real. Esaki ta di dos disculpa publico di Rey Willem-Alexander den e mesun aña, ya cu den augustus a circula un potret unda por a mira e pareha real y e doño di un restaurant, sin tapaboca ni distanciamento social.
