E polemica ta sigui na Mexico unda cu Miss Universo 1991, Lupita Jones, ta atrobe den luz negativo. E mucha muhe cu a keda corona como Nuestra Belleza Puebla 2016, Diana Leal, a demanda Lupita Jones pa separacion inhustificabel di contract y tambe el a acus’e di discriminacion. Cada biaha ta mas ex-reina di beyesa ta bay contra di Lupita Jones, y aunke algun solamente a haci declaracionnan riba e rednan social, Diana Leal si a haci un denuncia na e autoridadnan y el a gana e demanda.
Prome cu e certamen di beyesa tabata conoci como Mexicana Universal, e concurso cu ta wordo dirigi pa Miss Universo 1991, tabata yama Nuestra Belleza Mexico, di unda e representantenan di Mexico ta bay representa e pais na Miss Universo y otro concursonan di beyesa internacional. Diana Leal, a keda corona na 2016 como e representante di Puebla den e concurso, sinembargo algun luna despues nan a kita e corona y sjerp for di dje, lagand’e for di e concurso nacional. E tempo ey e organisacion di Nuestra Belleza Mexico a saca un comunicado den cual nan tabata señala e hoben di origen mixteca como falta di disciplina y compromiso.
Despues di un pleito di mas di cuater aña, Diana y su abogado, a gana e demanda contra e empresa Promo-Certamen, cu na e momentonan ey tabata e organisacion cu tabata realisa e concurso cu Lupita Jones tabata dirigi. E empresa a wordo acusa di un separacion inhustificabel di e contract, unda tabata viola e derechonan di Diana, ademas di su argumento di discriminacion pa su origen indigena. Na e momentonan aki e demanda ta den e fase di bay ehecuta e sentencia y mester cuantifica esaki, ya cu e abogado ta argumenta cu no ta solamente daño moral of emocional, sino economico, ya cu e empresa tabata comprometi cu Diana pa dune diferente premio cu el a gana.
