Manera a wordo anuncia aña pasa durante un conferencia di prensa, SETAR a lansa un servicio nobo di IPTV, esta Internet Protocol Television, cu ta bin combina cu un sistema nobo yama Wi-Fi Mesh. Cu e introduccion di e servicio aki, SETAR a start e proyectonan den diferente bario na Aruba, unda ta instalando Nodenan nobo y poniendo mas Fiber pa mehora e stabilidad di conexion di Internet y ofrece un plataforma mas moderno di Television. Ademas, e clientenan y e barionan cu ta ricibi un Node nobo ta wordo traspasa di biaha pa e servicio aki.
E instalacion di mas Node combina cu loke ta yama un Node Split ta necesario pa motibo cu ora cu un Node tin hopi cliente riba dje, esaki tin biaha por causa un “speed drop” ora cu tin mucho trafico riba un Node den un area. Door di haci e cambio aki por garantisa e continuidad di un miho conexion di Internet na cas y alabes trece e experiencia di Fiber mas cerca. Tambe esaki ta haci posibel pa den futuro por aumenta e speed substancialmente.
E cambio aki ta trece beneficionan cu ne. E servicio di Wi-Fi Mesh ta haci posibel speed di Internet mas halto, un Internet mas stabil y un miho cobertura den tur skina di cas. Y IPTV ta ofrece un experiencia completamente nobo pa e usuario cu, entro otro, un guia nobo, moderno y facil pa nabega, e oportunidad pa haci recordings, startover, catch-up TV y streaming riba devices cu e SETAR Live App ora ta na cas y mucho mas.
SETAR como un compania innovativo semper a percura pa trece lo ultimo den innovacion den tecnologia pa nos isla. E compania continuamente ta trahando pa mehora su servicionan y haciendo e inversionnan necesario pa esaki. Tur cliente di SETAR lo bay over pa e plataforma moderno aki den fase y lo wordo notifica y informa debidamente ora cu yega na turno. SETAR su Contact Center lo yama clientenan pa informa ki dia e cliente ta na turno pa bay over.
