Pa celebracion di nan prome aña, Tialda, Lia-Sophie y Zia-Marie hunto cu nan mayornan, Elsa y Franklin Richardson tabata riba e portada di Focus na november 2014. Awo casi 9 aña despues e famia ta bek riba portada cu celebracion di e Prome Santa Comunion di e triyeso Richardson. Como mayornan, Elsa y Franklin, a sa di haci e dia aki uno inolvidabel den bida nan tres yiu muhenan, paso ta un celebracion importante cu nan ta experiencia un biaha solamente.
Un celebracion cu un significacion asina importante pa famia Richardson, sigur ta un ocasion pa comparti e alegria cu tur hende cu a sigui e crecemento di Tialda, Lia-Sophie y Zia-Marie a traves di Focus. E recuerdo di Elsa y Franklin di e portada na november 2014 ta uno inolvidabel, di cual Focus a duna nan e oportunidad pa conta nan experiencia di nacemento di nan yiunan na un pais stranhero.
Despues di e portada na aña 2014 nan por bisa cu Tialda, Lia-Sophie y Zia-Marie a bira conoci den comunidad na unda cu nan bay. Tur caminda e hendenan tabata acerca nan y duna nan palabranan di apoyo pa un bunita experiencia di bida cu Franklin y Elsa como mayornan a pasa y ainda ta pasando aden. Como creyentenan fiel nan satisfaccion ta wak nan yiunan cu hopi salud y fuerte di tur peliger.
Den Focus Digital Magazine di e luna aki por lesa mas di tur locual e mayornan ta comparti tocante e crecemento di triyeso Richardson. E revista ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
