E inspiracion di Alexandra Suarez pa inicia cu Aruba Luxury Flying Dress a nace principalmente door di su biahenan. E tabatin e oportunidad di conoce hopi luga y semper ora di biaha ta busca experencianan diferente y special, cu ta permiti’e conecta cu cada destinacion. Alexandra a descubri e concepto di flying dress mientras e tabata biaha pa luganan manera Santorini, Italia y Turkia, caminda e tabatin e oportunidad di realisa sesionnan di potret cu profesionalnan increibel. E tabata fascina cu e concepto, pero el a puntra su mes tambe: “Con un experiencia manera esaki lo ta den Caribe, cu lama como e escenario?”
Te na e momento ey, e tipo di sesionnan aki tabata hopi asocia cu destinacionnan hopi specifico manera Santorini, Venecia of Capadocia. Eynan a nace e idea di trece e experiencia aki na Aruba y dun’e nos propio identidad, resaltando e lama, beach y paisahe. Di e forma aki, Alexandra a bira e pionero den trece e concepto di flying dress den Caribe, creando un experiencia cu ta combina fotografia, moda, biahe y e beyesa natural di Aruba. Ora di e lansamento di e negoshi, un di e desafionan tabata pa saca e nomber eyfo, pero tambe siña con pa adapta e concepto di flying dress na Aruba.
E tipo di fotografia aki por ta mucho mas simpel na luganan cu poco biento, pasobra tin mas control riba e movecion di e shimis. E team na Aruba mester a siña traha precisamente cu loke ta caracterisa nos isla: e biento, e solo y e condicionnan natural. Un di luganan faborito di Alexandra Suarez pa saca potret na Aruba ta definitivamente Mangel Halto. E ta encanta e colornan di lama, e contrast di e naturalesa y e variedad di escenario. Ademas, tin un schommel precioso cu ta laga nan crea imagennan diferente y hopi special.
Aruba ta un isla hopi special pa Alexandra, pasobra el a habri porta for di momento cu el a yega. Aki el a haya e oportunidad di desaroya varios negoshi y cu cada uno cu experencianan hopi positivo. E ta kere cu bibando riba un isla manera Aruba ta inevitabel pa transforma bo proceso creativo. Bo ta bay adaptando na e clima, paisahe, lama, color y naturalesa cu ta rondona nos. Alexandra Suarez ta conta con su negoshi a desaroya desde e prome photoshoot na 2020 y dicon e tendencianan den biahe di luho ta cambiando den Focus Digital Magazine. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
Aruba Luxury Flying Dress
