E cantante y actriz, Lady Gaga, a converti door di su propio merito den un di e faboritonan pa gana e premio Oscar pa e miho actriz protagonista. Su interpretacion di e socialite, Patrizia Reggiani, cu a wordo acusa den e decada nobenta di a contrata un ‘hitman’ pa deshaci di su casa, Maurizio Gucci, rol interpreta pa Adam Driver den e pelicula, House of Gucci, finalmente a posiciona Lady Gaga como un di e streanan contemporaneo di cinema.
E artista a papia den varios ocasion tocante e forma con el a mescla cu su personahe pa dune credibilidad den su actuacion y pa basicamente converti su mes den un ‘clone’ di Patrizia. Pero, te awo e no a comenta tocante e maldicion cu Patrizia a mande riba dje, pa venga su decision pa participa den un proyecto cu ta profundisa den su pasado scur.
Lady Gaga ta conta: “Riba e ultimo dia di shooting, mi tabata riba e balcon den mi apartamento na Roma, Dean Martin su cantica Mambo Italiano tabata tocando y mi tabata humando un sigaria. Mi tabata interpretando Patrizia y di algun manera mi tabata sa cu mi mester a despidi di dje. Diripiente un multidud di musca a cuminsa sigui mi tur caminda, di berdad mi a pensa cu el a manda nan pa mi. Na e momento ey, mi tabata cla pa bis’e ayo”.
Contrario na e manera- y metodonan di Patrizia Reggiana pa ‘boycott’ e produccion di e pelicula, House of Gucci, e herederonan di Aldo Gucci no a warda hopi pa manda un comunicado pa critica e manera con e cineasta Britanico a enfoca su mes riba un tema asina delicado. Nan a expresa tambe nan decepcion, cu e no a ni sikiera consulta nan prome, pa por a conta nan storia cu mas precision posibel.
