Despues di a pidi man di Sue-Ann cerca su tata na december di 2017, e presion pa e compromiso mes a cuminsa. Con hacie pa keda den mi ‘line’, di ta diferente y unico. A pasa tur sorto di cos den mi cabes. Y debi na mi profesion, mi tin acceso na un sin fin di posibilidad. Pero na final, mi a opta pa e forma mas inespera, simpel y toch impactante y importante pa mi pareha Sue-Ann; uno cu ta envolvi su famia. Sue tin un famia grandi, uni, literalmente y fisicamente (habri porta di cura y bo a drenta cura di e otro familiar).
Riba internet mi a topa cu un forma hopi apart di presenta e renchi, esta hinca den un awacati. Sue-Ann gusta awacati y awacati ta schaars na Aruba, mescos cu e hende muher, manera Sue-Ann, ta unico! For di e prome momento mi a dicidi cu esey t’e! Pero e renchi tambe mester ta diferente. Mi a busca aki y tur caminda, pero no por a haya uno cu a impresiona mi. Finalmente a logra diseña uno diferente, na mi smaak. Briyante, pero no druk. Y for di e comentarionan awor, mi ta nota cu mi a logra mi meta pa cu e renchi. Pa planea e compromiso, tambe a rekeri poco trabou. A envolvi un tanta di Sue-Ann y dos amiga hopi cerca di nos dos.
E plan final a bira cu ‘supuestamente’ lo a bay come na nos restaurant favorito, pero cu ta haya un desvio inespera. Un yamada pa presenta urgentemente na cas di un di e tantanan (cu tin un happy hour familiar tur diabierna toch) y cu Sue-Ann mester a presenta. Mi a uza e excusa pa bay baño y eyden encontra e awacati y prepara e renchi etc. Na final, a sali for di e baño, confronta Sue- Ann cu e awacati y e renchi y wel…E resto ta conoci y awe Sue-Ann ta mi comprometida feliz. Dia exacto pa casamento, nos no tin, pero si e aña. Keda pendiente!
