Diasabra e cantante Alejandro Fernández a celebra 50 aña, cu tabata uno hopi significativo pasobra ademas di alcansa mitar siglo di bida, ta prome biaha cu e ta celebra su cumpleaño cu su nieta. Dia 14 di maart ultimo Camila a duna luz na su prome yiu, cu el a duna e nomber: Cayetana. Algun detaye di e fiesta di cumpleaño na honor di e yiu di Vicente Fernández, a ser comparti a traves di e rednan social pa su yiunan. Solamente un circulo cercano di amigo a asisti na e celebracion, unda no a falta e brindis, abraso y reencuentro.
E prome pa felicita Alejandro Fernández tabata su primogenito, Alex, ken a demostra con hopi e ta admira su tata. “Di chikito, mi a bisa na Dios cu mi kier ta grandi pa ser manera bo… ¡Feliz cumpleaños, pá! Te amo”, e hoben a skirbi riba su Instagram, unda el a comparti un potret unda e ta sali ta brasa su tata dunand’e un sunchi tempo e tabata chikito. Ademas el a post un imagen hunto cu su tata y den cual por a haya un bista di e fiesta: “El jefe”, tabata e caption cu Alex a scoge pa e imagen. Despues di a supera Covid-19, Alejandro Fernández a resalta e importancia di vacuna. El a ricibi e prome dosis prome cu el a ser contagia y den su entrevista cu El Gordo y la Flaca, el a bisa cu aunke bo ta vacuna bo mester sigui cuida, pasobra bo por contagia y contagia otro hende cu no ta vacuna.
