NICOLE GODETT SU INSPIRACION PA SKIRBI “RAISING QUEENS”

Nicole Godett (36) a nace y crece na San Nicolas y ta mama di dos yiu muhe maraviyoso, Nayah y Nimah, cu tabata su forsa y inspiracion den su dianan di mas dificil. Nicole a obtene su Bachelors Degree in Social Work and Development na Universidad di Aruba apesar di a perde su mama, ken ta su role model y apoyo principal. Na 2018 el a lansa e plataforma riba rednan social ‘Empowerment Queen’, cu e obhetivo pa inspira, empodera, educa y conecta hende muhernan di tur nivel social. Nicole ta encanta tanto lesa buki como skirbi poesia y desde 2024 el a bira conoci como autor publicando su prome buki “Raising Queens”.

Nicole Godett su inspiracion pa skirbi “Raising Queens” realmente a cuminsa 13 aña pasa, tempo e tabata comparti storianan cortico y combersacionnan riba Facebook cu su yiu Nayah cu tabatin 3 aña. Cu tempo esaki a bira mas frecuente y cual a entretene su Facebook friends di cerca y leu. Mas despues el a agrega tambe storianan di su segundo yiu muhe, Nimah, cual a spierta mas interes entre su amigonan di Facebook te na e punto cu nan tabata spera cu excitacion riba su posts.

Un dia el a ricibi un comentario di su ex-kleuter juffrouw, Hetwig Kuiperdal, bou di un di su publicacionnan consehand’e pa converti su storianan den un buki. Na e momento ey e no a haci nada cu esaki. E tabata na 2022 cu Nicole tabata pasando den un momento dificil mentalmente y el a cuminsa haci algun ‘soul searching’. E momento ey el a dicidi cu e kier skirbi un buki y a agrega esaki riba su lista di manifestacionnan. Reflexionando el a corda riba e comentario di Facebook y a dicidi cu e mester converti tur e posts den un buki.

Nicole su inspiracion diario ta bin di oracion y afirmacion. E ta kere firmemente cu nos tin e poder di manifesta e bida cu nos ta desea y merece. Den Focus Digital Magazine di e luna aki, e autor di “Raising Queens” ta elabora tambe tocante su don cu el a descubri for di chikito, ora el  a cuminsa mira y scucha cosnan cu otro hende no por a mira. El a haci tur loke ta posibel pa ignora su don, pero na 2022 algo hopi extraordinario a pasa cu ne. Lesa e interesante entrevista cu Nicole Godett den e revista cu ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).

Download bo revista awo!