Duchess of Sussex a haci un aparicion deslumbrante na Fashion Awards dialuna anochi, den un shimis di Givenchy pa presenta “Designer of the Year Award” na e diseñadora di su shimis di bruid y director creativo di e marca, Clare Waight Keller. Meghan a luci moderno y elegante den su outfit pa e anochi di premiacion aki, y el a finalisa su look perfectamente uzando nail polish color scur pa presenta riba escenario, cu a keda bunita y unico.
E tono briyante ‘deep plum’ tabata e escogencia perfecto pa e manicure pa e ocasion, particularmente cu e trahe preto ‘one-shouldered’, cu su joyanan den oro y su cabey liso.
Tradicionalmente, e miembronan femenino di e famia real ta opta pa un pintura di huña transparente y neutral. Tanto Duchess of Cambridge como Queen Elizabeth nan color predilecto ta Essie Ballet Slippers. Mientras cu Meghan usualmente ta uza un tono mas nude. Sin embargo, e lo kier a haci un ‘statement’ na e Fashion Awards cu ta un evento di moda y estilo.
No ta e prome biaha cu Meghan Markle ta scoge un pintura di huña color scur y parce cu e ta un fan di e colornan intenso. Na e recepcion na Government House na Wellington, durante su reciente bishita cu Prins Harry na New Zealand, e dukesa a luci un pedicure den color scur cu su look completo den color preto. Ta parce cu e regla pa color di pintura di huña neutral ta uno traha pa kibra, ya cu Prinses Eugenie tambe ta prefera manicure briyante. E ta kisas mas un opcion personal na lugar di un protocol streng cu mester sigui como miembro di famia real.
