Aruba su Reina di Carnaval 2017, Sabina Rey, a laga tur hende spera cu ansiedad pa mira e prome potretnan di Sophie Marie Gordon. Despues di algun luna di nacemento di e prinses di pareha, Gordon-Rey, nan a comparti un bunita photo shoot riba nan rednan social. E potretnan aki Sabina Rey y Shawn Gordon a comparti tambe den Focus Digital Magazine di juli. Nan a bisa di a dicidi for di principio pa mantene e prome imagennan entre nan. Asina nan por disfruta di e prome momentonan asina special como famia. Unabes cu Sophie Marie a bira un poco mas grandi nan a sinti confortabel pa haci un photo shoot y comparti esaki.
Sophie Marie a nace riba e fecha 31.01.24 y su mayornan ta bibando un bunita experiencia mirando con nan baby ta creciendo, cu pa ambos ta un gran bendicion. E ta creciendo super lihe y ta siña algo nobo tur dia, cu ta duna nan un sintimento di alegria y orguyo. Un dia hopi special pa Sabina y Shawn tabata e bautismo di Sophie Marie na Misa Inmaculada Concepcion. Como madrina nan a scoge Sabina su prima, Meghan Tromp, y como padrino, Jaquon Eisden, cu ta e miho amigo di Shawn. Nan tur tres hunto a asisti na un preparacion pa asina sa e significacion di e bautismo den Sophie Marie su bida.
Pa Sabina ta importante pa no solamente batisa Sophie, pero lant’e cu palabra di Dios. E por reflexiona na su infancia con su defunto welo, Poy Werleman, semper tabata hib’e misa tur diadomingo. Pa Shawn su Fe den Dios ta grandi y mescos cu su mayornan a siñ’e cu den tur momento bon of malo, pa tin Dios central den su bida, e lo kier pa Sophie tambe siña esaki. Den Focus Digital Magazine di e luna aki, pareha Gordon-Rey ta comparti nan felicidad hunto cu nan prinses. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
