No laga e ‘heat of the moment’ durante un desacuerdo domina bo
E argumentonan por bira hopi cayente y por cuminsa hopi liher. Den un fraccion di seconde loke ta cuminsa como un desacuerdo, ta transforma den un argumento cu por tin un final hopi mahos. Normalmente un discusion verbal ta presenta, pa motibo cu e estado di emocion di ambos di esunnan involvi den e desacuerdo ta intensifica.
Nos tur sa haya nos mes den diferente situacion sea na trabou, na cas, den nos relacionnan intimo y tambe den un circulo di amistad, caminda un desacuerdo of argumento por tuma lugar. Como humano ta masha normal pa sinti diferente emocion di cual esaki por domina of ‘trigger’ un motibo pa cuminsa un discusion cu un persona. Na e otro banda, ora e emocionnan ta mucho halto esaki por causa cu nos ta perde bista riba e “bigger picture” y en bes di argumenta cu echo, bo emocion ta cuminsa papia pa bo persona. Control riba emocion ta algo cu ta tuma practica, disciplina y constantemente refleho propio riba bo accionnan. Pa dificil cu esaki ta mustra, e realidad ta, cu actua a base di emocion ta un habito cu mayoria persona a desaroya y pues no ta un refleho di ken en berdad nan ta (nan “true self”). Pues di e mesun forma di actua cu a bira normal pa medio di habito, esaki tambe por cambia cu practica.
Pakico ta necesario pa no actua a base di bo emocionnan?
Prome cu tur cos ta importante pa compronde cu ta normal pa reconoce bo emocion y permiti bo mes pa sinti esaki, pero na un forma controla. Ora un persona constantemente ta laga su emocionnan tuma over su habilidad pa comunica efectivamente cu otro, e por causa hopi problema y desekilibrio den e relacion. No solamente esaki, pero e por bira un “turn off” den relacion romantico y hasta bira un motibo pa aleha di e persona.
Forma pa controla emocion durante un discusion
E habilidad pa tin dominio y control riba emocion durante un situacion fastioso, caminda un discusion por surgi, no ta mesun dificil cu e ta mustra.
• No reacciona inmediatamente
Mayoria discusion ta escala pa motibo cu automaticamente nos tin e tendencia pa reacciona lihe. Haciendo esaki, nos no ta tuma e tempo pa analisa e situacion y tur e factornan cu ta hunga un rol prome cu responde of purba di yega na un punto mutuo. E prome stap cu bo lo mester tuma pa asina controla bo emocionnan ta, pa ‘delay’ bo reaccion inmediato durante un discusion. Tuma algun minuut pa hala un par di rosea profundo, relaha e musculonan y asina trece bo mente na trankilidad. E reaccionnan inmediato ta causa cu nos ta actua mucho lihe a base di emocion y cu e resultado cu nos ta tuma decision, cu kisas despues ta arepenti.
• Mantene bo bos abou
Un factor cu ta crea emocion for di control durante un discusion of desacuerdo ta hisamento di bos. Algun persona tin e tendencia pa cuminsa grita of hisa nan stem durante un discusion y asina nan ta perde bista riba kico realmente nan kier bisa. Pa con hopi bo no ta di acuerdo of no a gusta kico e otro persona a dirigi na bo, trata na mantene bo bos abou y papia en bes cu esaki bira un intercambio di gritamento, cu sigur no lo caba bon.
• Tuma un pausa y distancia bo mes
Tin momento, cu a pesar cu nos ta trata na controla nos emocionnan por escala, ora cu un argumento bira hopi cayente of for di control. Den un situacion asina permiti bo mes pa tuma un pausa y distancia bo mes (si ta posibel fisicamente) di e problema y e persona. Por ehempel durante un argumento cu un persona sea na trabou of cu bo pareha, bisa e persona cu bo lo desea algun minuut di pausa. Tuma algun minuut pa cana y procesa bo emocionnan door di puntra bo mes: “Kico mi ta sinti aworaki?, “Kico a ocasiona pa mi sinti asina?”, y “Den ki forma lo mi por yega na un punto mutuo?”. Ta importante pa reconoce cu no ta necesario pa keda discuti cu otro, te ora resolve e problema. Ta comproba cu ora ambos partido tuma tempo pa relaha y tuma un break, no solamente e emocionnan ta baha, pero tambe bo habilidad pa pensa critico y analisa e situacion cu claridad ta mehora.
• Practica e “container-method”
Un forma eficiente cu por yuda bo regula bo emocionnan no solamente durante un discusion, pero tambe en general ta un practica psicologico cu yama ‘container method’. E momento cu bo ta sinti bo emocionnan cuminsa subi y cu nan ta tumando dominio riba bo of durante un momento no apropia, por ehempel durante un reunion di trabou of durante un diferencia di opinion cu a bira un discusion, imagina un container of un cashi dilanti bo. Den e container of cashi aki bo ta bay purba di mentalmente hinca tur e pensamento- of sentimentonan frustrante aden. Despues di a haci esaki, imagina cu bo ta cer’e na yabi of na lock y scoge un momento apropia, pa habri e container bek y purba resolve e problemanan aki.
Den un momento di emocion halto nos por tuma hopi decision cu por ta costoso, simplemente pasobra nos curason ta domina nos habilidad pa pensa y refleha. Ningun desacuerdo, argumento of discusion mester ocupa un espacio grandi cu por crea un desunion entre abo y e otro persona. Na final di dia, ta importante pa reconoce, si e problema aki en berdad ta mas grandi y importante cu bo relacion cu e persona (sea laboral, personal y tambe intimo).
Skirbi pa Keyla Reeder
