E publico a scoge Karena Maduro pa ricibi e Reconocimento FOCUS Pantene Inspiracion 2018 y e tabata riba e portada di FOCUS aña pasa november. E aspecto di plus sizes a haya un twist positivo y completo na Aruba y Karena su aporte na e cambio di imagen aki sigur ta di aprecia. Como modelo el a haye den ‘shelter in place’ ta trece su photoshootings na cas y multitask; modelahe y fotografia den sala di su cas, cu el a transforma den un studio. Door di su kebrante di salud, e ta schedule su trabou pa despues di merdia, cu ta ora e remedinan ya ta haciendo nan trabou, e por saca forsa pa cumpli cu e clientenan. Karena a bisa: “Mi a siña Roeien met de riemen die je hebt”.
Pa loke ta famia Karena a enjoy e ‘bonding’ y nan ta 8 hende bou di e mesun dak aworaki. Nan a cuminsa enjoy come hunto y comparti tempo balioso cu otro. E rutina cu mas e ta haya falta di dje sigur ta su ‘gym time’! No solamente pa motibo cu gym ta cera, pero tambe door di su kebrante di salud, cu a haci dificil pa e por a train manera e ta custumbra. E impacto di COVID-19 den su caso cu e mester a keda cera paden, no a afecte asina tanto debi cu e tabata traha caba independiente for di su cas. Loke si a cay duro p’e ta cu su entrada a baha drasticamente, sinembargo apesar di tur cos, e por bisa cu pasando asina tanto tempo den cas cu su famia, ta algo cu el a echt enjoy inmensamente.
Mientras cu Karena ta na cas, e ta cuminsa e dia cu su yiu su homeschooling parti mainta. El a uza e oportunidad aki pa yena su mente cu cosnan positivo. El a dicidi di cuminsa lesa su bijbel bek y scucha hopi audio di diferente ‘motivational speakers’. Pa Karena esaki ta e combinacion perfecto pa no cay den depresion, y keda enfoca cu un dia e situacion aki lo pasa. Mentalmente e mester ta prepara pa ora nos bay bek den normalidad. Tambe nan a enjoy dinner den famia, cual ta algo cu nan kier keda implementa hasta despues di cuarentena. “Ta importante pa uza nos tempo mas productivo cu por ta posibel, tur dia nos por siña algo nobo”; Karena a comparti den e entrevista aki cu FOCUS Online.
‘HELICOBACTER PYLORI’
E temporada cu nos mester a keda cas y no por a bay gym, a crea pa hopi e temor cu lo perde nan condicion, sinembargo Karena a perde peso den e cuarentena. “Ami si a perde peso y probablemente lo sigui perde. Den e tempo dificil aki, mi a pasa y ainda ta pasando den un situacion poco fastioso cu mi salud. Mi a wordo diagnostica cu ‘Helicobacter Pylori’ y hunto cu antibiotica esaki a bin cu un dieet basta specifico y streng pa mi por recupera. Y si mi come algo cu mi no mag, mi ta sufri e consecuencia cu dolornan hopi fuerte y falta di rosea. E tratamento riba su mes tambe a causa hopi malestar, nausia, dolor di cabes, gas, dolor di stoma y hopi mas. Pues door di esaki tambe mi no por tabata muchu fisicamente activo cu training manera mi tabata custumbra, ya cu mi ta perde rosea y mi por hasta hiperventila y cay abou pa falta di rosea. Pa e motibo aki tambe con cu mi tabata sinti, mi a haci e test COVID-19 y el a sali negatief. Y te despues cu mi a haya e resultado aki porfin mi a haya atencion pa mi kehonan, cu a bin haya sa kico mi tin en realidad”.
PLANNAN 2020
“Pa loke ta mi business plans mi a djis schuif nan mas realisticamente posibel. Esey si, nunca mi a perde mi focus di loke mi ta bayendo p’e. Awor tur cos ta depende di e normal nobo! Sigur algun plan cu mi tabatin pa bay afo lo ta kizas te otro aña awor. Pa loke ta e bida normal nobo sigur algo cu mi ta enjoy ta homeschooling y mi no ta mind pa sigui cu esaki. Ya caba mi a implementa e cambio con pa saluda mi amistadnan. Tur cos lo depende di con tur cos ta sigui, kico lo mag y kico no. Mi challenge lo ta distancia di mi friends y models ya cu mi ta un persona hopi social. Last pero sigur not least ta busca mi bida spiritual bek! Conecta bek cu Tata y si ta su boluntad, pronto halsa mi bos un bes mas pa ador’E y alab’E”.
