![](https://focus.aw/wp-content/uploads/2021/05/Forsa-di-Shelo-at-10.02.27-AM-1024x736.png)
Den luna di september 2020 a nace e anhelo cerca Solmaita Yarzagaray-Leest pa traha riba un proyecto, cu e meta pa trece conscientisacion di cuido di nos salud mental. Solmaita a acerca su casa, Eltienne Yarzagaray, pa forma parti di e proyecto y pa traha riba un cancion pa esaki. Meymey di tur e turbulencia di e pandemia, Eltienne a ricibi e inspiracion di shelo for di cual a sali e composicion di e cancion “Forsa di Shelo”. E cancion aki “Forsa di Shelo” ta conecta nos cu nos Creador. E ta recorda nos cu Dios ta e Fuente di nos bida y cu pa medio di dj’E nos por enfrenta tur cos.
E proceso di produccion di e cancion a tuma lugar den e lunanan di januari pa maart 2021 y tabata bou encargo di Miguel Genser. E coristanan cu a forma parti di e cancion ta: Tabitha Smith Heemstadt, Ghislaine Grant, Arelys Domacasse Franken y Mayra Kelly Bennett, baho den man di Diego Henriquez y riba guitara Jeanoir Koolman. Gilner Dirksen tabatin e tarea pa haci e mixing y mastering di e produccion aki. Eltienne y Solmaita a aserca Levy Geerman di Povi-Tree pa e realisacion di e video clip pa e cancion “Forsa di Shelo”. Solmaita mes a percura pa e script di e video clip cu adaptacion y produccion door di Levy. Actornan di e video clip ta Afra Henriquez y Reinwald Geerman. Por mira e video clip “Forsa di Shelo” via e YouTube channel di Eltienne Yarzagaray. Den bida nos por confronta diferente reto, cu por pone nos perde forsa y fe, pero pa medio di Dios nos ta recobra forsa cada dia di nobo pa biba un bida cu proposito.