Baña cu awa friu tin hopi beneficio pa e curpa, p’esey hopi hende, incluyendo e famosonan, a opta pa tin e paso aki den nan bida diario. Lo por corda riba e Ice Bucket Challenge, un campaña algun aña pasa cu tabatin como obhetivo pa crea conscientisacion tocante e enfermedad di Amyotrophic Lateral Sclerosis. Esaki tabata consisti den tira un hemchi yen di awa frieu riba bo curpa. Awel su popularidad no a keda solamente na e bon causa aki, sino tambe e hendenan a dicidi pa keda cu e practica aki, aunke no mescos, pero si hopi parecido.
Esaki ta trata di un baño cu awa friu of duik den un hemchi grandi cu ijs. A keda comproba cu esaki por yuda na mehora e circulacion, stress, aparencia di e cuero y relaha e musculonan entro tanto beneficionan. E bentaha di baña cu awa friu manera ya a menciona, ta duna hopi beneficio ora bay algun grado bou cero, pero esun principal ta pa mehora e cuero. Sinembargo mester keda bon cla cu esaki no ta sustitui bo rutina di beyesa ni niun producto, en realidad ta un forma pa yuda y haci e cuero mas firme y fuerte.
Awa friu ta yuda mehora e circulacion, pero tambe ta promove e produccion di colageno y elastina den e cuero, ya cu e proteinanan aki cu tempo ta disminui den nos organismo, y nan ta algun cu ta encarga pa mantene e cuero firme y cu su briyo, y ademas nos sa tambe cu frialdad ta yuda haci e cuero strak. Di otro banda tanto awa friu como ijs of tools manera roller di jade (ora e ta super friu), por tin un funcion anti-inflamatorio, kiermen si bo a drumi poco y bo kier disminui e saconan bou di e wowonan, ya bo sa kico pa haci…
Cuanto tempo mester baña den awa friu of casi ijs, no ta nada facil. P’esey mester cuminsa poco poco. Cuminsa cambiando e awa cayente pa awa friu durante 15 seconde y manera cu bo ta bayendo wantando mas, bo ta aumenta e tempo. Awo si bo no kier un cambio asina drastico, loke si bo por haci ta pa baña cu awa un poco mas lauw. Pa loke ta trata bo cara, ora ta haci e limpiesa facial diario, sigura bo mes cu e ta na e temperatura aki. Entre e super famosonan cu ta baña cu awa friu no tin nada menos cu e astro di futbol Cristiano Ronaldo, y tambe e super star Lady Gaga. Si nan a experencia e beneficiona pa baña den awa friu y hasta a hacie un trend… Pakico no purba un baño den awa cu ijs den nos clima calor?
