E charity gala anual organisa pa Kiwanis Club of Aruba ta scoge semper e temanan perfecto pa presenta un anochi magico y yena di diberticion. Despues di dos aña ausente, e expectativa ta grandi sperando riba e fiesta aki, cu e tema ‘Cirque du Soleil’ cual ta inspira tur e fantasia pa crea un anochi fascinante.
Resumiendo algun di e temanan di e ultimo añanan; Havana Nights, Fire & Ice, Oxigen, Casino Royale, Great Gastby, Dubai Wine Gala y Gala of the Thrones, loke sigur a resalta ta e creatividad, elegancia y estilo riba e red carpet. E aña aki cu Cirque du Soleil esaki no lo bay ta un excepcion, unda lo por spera un biaha mas cu e hende muhernan lo luci creacionnan diseña cu briyo, glamour y elegancia.
Desde cu Kiwanis Club of Aruba a lansa e tema di nan Charity Gala 2022, e buskeda a inicia cua ta e look pa e fiesta di gala tan spera di aña. Hopi biaha ta tuma e celebridadnan como inspiracion pa crea e look segun e estilo y gusto di cada persona. For di e diseñonan di mas extravagante te na esnan mas simpel, pero impactante lo bay competi pa diferente categoria di premio pa Best Outfit Cirque du Soleil 2022.
E grandioso evento aki cu su meta principal ta pa recauda fondo pa por sigui yuda diferente instancia den nos comunidad ta diabierna 18 di november den Renaissance Convention Center for di 8.30 p.m. pa 2:30 a.m. E ta un fiesta cu durante 6 ora largo lo bay disfruta di entretenimento non stop. Prijs pa ticket ta AWG. 450.00 pa dos persona y ademas di baile y gozo, por disfruta di diferente bar cu variedad di bebida y un buffet exkisito.
