Kisas cu nos no ta corda tur cos cu nos Padushi por a bisa nos den pasado, pero loke si nos ta corda ta e cuminda cu nos Madushi a cushina. Dicon? Factornan manera e holor di e cuminda, e silencio den e cushina unda e unico cu bo por a scucha ta e carni hasando, e proceso con un simpel plato ta wordo poni riba mesa cu hopi respet, pero mas importante e enfoke di nos Madushi pa e por keda cla pa ora e proveedor di e hogar yega cas. Algun di e recetanan a wordo poni riba papel pero e memorianan tras di cada preparacion tabata dificil pa documenta esaki.
Den su seccion mensual den Focus Digital Magazine, Gerald “Gino” Kock ta conta di su experiencia creciendo y compartiendo cu su madushi y padushi. E ta bay conscientisa pa rebiba e memorianan bunita aki cu hopi a wordo laga atras. Por ehempel e sonrisa di nos Madushi riba su cara y un amor inmenso ora di cushina pa su casa y yiunan. E pregunta ta bira, kico ta haci e receta di nos grandinan mas dushi? E ingredientenan y tecnica di cushina of e amor cu nan tabata cushina e tempo ey cu ne?
Preparacion di nos platonan durante e epoca di e refeneria Lago Oil & Transport Company
Tabatin un tempo na Aruba caminda bida tabata draai rond di e refineria, caminda e tabata forma e ritmo di famianan completo, y hombernan tabata traha warda di mainta pa merdia y di merdia pa anochi. Trucknan di transportacion tabata carga nan bay y bini for di trabou, y Padushi di Gino tabata un di nan. E tambe a forma parti di un sistema caminda trabou tabata defini tempo y e rutina tabata defini bida. Pero e trabou principal no tabata termina na e porta di refineria, pasobra mientras Padushi tabata traha, algo mas structura y cu mas disciplina cu amor tabata tumando luga den e cushina na cas.
E disciplina paden di cushina
Na e momento ey Madushi tabata preparando e cuminda, no casualmente of entre otro tareanan di cas, sino cu atencion completo. E cushinamento no por a wordo stroba y e cuminda tabata cla y presenta comosifuera ta un rey ta bin di bishita. Riba esey, ora e tabata come, tabata haci esey sin interupcion, sin boroto pero cu hopi respet. Esaki entre otro a forma parti di e structura invisibel cu tabata defini e hogar di famia.
Loke no por wordo poni riba papel
Despues di tempo, ora a toca Gino pa bay studia e arte culinario na Merca, cada bishita bek na Aruba e tabata purba capta e cushinamento di su Madushi na un manera diferente, door di observa delaster ingredientenan cu e tabata uza, documenta unda cu por, skirbi, midi y registra tur detaye loke tabata pasando su dilanti. Despues el a purba di ripiti e proceso, paso pa paso, pero e resultado nunca, pero nunca tabata cuadra cu loke su Madushi tabata produci. Asina mes uzando e sistema tecnico y academico pa skirbi tur proceso di cushina un receta, pero nada!!! E ingredientenan tabata corecto den su forma pero no den su esencia, no den su sabor y no den su textura.
Den e revista di e luna aki, Gerald “Gino” Kock ta splica kico por a bay robes cu esun di dje despues di combersa cu varios chef local cu e mesun experencia aki. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
Texto y Potret: Gerald “Gino” Kock Ph.D.
Food Tourism Ambassador WFTA
