ESTHER TA E INSPIRACION DI KYRA PA COMPETI DEN E WEGANAN OLIMPICO  

Representa Aruba ta nifica pa ambos, specialmente como un famia cu un historia largo den deporte, e orguyo pa wordo reconoci como di Aruba. E miho recuerdo di Esther Croes na e Weganan Olimpico 1984 tabata e apertura. Drentando e stadion cu alrededor di 100 mil hende apoyando tur e paisnan tabata un sentimento increibel y mas ainda cu e tabata dia cu el a cumpli 18 aña. E inspiracion ora Kyra Hoevertsz a namora di e deporte tabata su mama, pensando cu e kier ta mescos cu ne pa competi den e Weganan Olimpico. Su meta pa e siguiente etapa como un atleta elite ta pa clasifica pa Weganan Olimpico 2028.

Kyra Hoevertsz tin 18 aña competiendo y sigur 3 biaha pa aña. Y cuanto medaya e tin?  Kyra ta contesta:”😊 Basta! Pero locual ta significa hopi mas ta ful e proceso pa a yega na e resultadonan ey. Cuminsando cu 7 aña, mi añanan deportivo ta oportunidad tras di oportunidad. Ora un oportunidad t’ey, e ta keda na mi persona pa traha duro p’e pa mi por logra esaki”. Segun Kyra e no ta kere cu e historia profundo di su famia den landamento sincronisa a influencia su trayecto, pero si su determinacion y perseverancia como atleta. Kyra ta keda motiva riba dianan cu entrenamento ta sinti duro of progreso ta slow door di corda su mes cu e pasonan chikito cu e ta haci ta esnan cu ta suma na final. E dianan cu e no tin hopi motivacion, e ta pensa riba su ‘pakico’ e ta haciendo tur e deporte aki. 

Un momento cu Esther Croes como mama a experiencia e sentido di orguyo di mas fuerte tabata riba e dia cu Kyra a gana e prome medaya na Weganan Centroamericano y del Caribe 2014 pa Aruba na Mexico. Desde cu su yiu muhe a dicidi di sigui e mesun deporte cu ne, ademas di a bira masha contento mes, Esther a pensa cu e por yud’e y gui’e pasobra e sa di e deporte. Mirando bek, Esther ta bisa: “Kyra ta un atleta hopi talentoso. Y e ta un atleta hopi “leergierig” si su coachnan bis’e algo pa haci e lo haci de todo pa make sure cu e lo por haci esaki. Y e ta durf di purba cosnan nobo of diferente tambe. Y den awa e ta durf di sali for di su comfort zone”. Awendia den su trabou como partera, Esther su disciplina pa por a haci e deporte na nivel ta sigur algo cu a yud’e mirando cu e trabou aki ta hopi iregular.

Esther Croes y Kyra Hoevertsz ta ilustra e portada di Focus Digital Magazine di mei cu ta honra e celebracion di “Dia di Mama” unda nan ta comparti nan bunita laso como mama y yiu ademas nan conexion cu landamento sincronisa. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)