Candy Rasmijn-Reino ta pa mas cu un aña caba e Brand Ambassador di e marca Brazilero; Carmen Steffens. El a haci su invitacion pa celebra su cumpleaño na e cas di moda aki cu e ta representante. E anochinan di celebracion y disfruta di tur loke ta ‘in store’ ta un estilo nobo cu nan a introduci den e concepto di e marca.
Candy a cumpli aña dia 22 di augustus pero el a scoge diasabra anochi pa celebra su fecha natal cu su sernan keri. Cu su carisma, elegancia y estilo unico, el a ricibi su invitadonan na Carmen Steffens na Paseo Herencia. Mientras cu e invitadonan tabata networking y disfrutando di e coleccion nobo den e tienda, nan a haya bubbly sirbi den flute di CS. Prome cu Candy a inicia cu e parti di e quiz y wega unda el a regala premionan bunita pa e ganadornan, el a duna un informacion cortico di su plannan na Colombia, cu na su debido tempo e lo bay elabora mas riba e proyecto. Candy ta Board Director di “Women’s Empower Network Foundation” pa representa e hende muhe unda cu e yega y laga atras su marca personal. Candy a inicia recientemente su compania Connect, cu ta un compania cu ta duna servicio di branding, marketing, digital PR y evento corporativo.
