Na Aruba tin varios hende y famia cu ta aplicando e estilo di bida vegano. FOCUS en conexion cu su edicion di mei 2017 pa highlight ‘Mother’s Day’, a entrevista dos mama hoben cu ta vegano y ta lanta nan yiu tambe vegano.
Eugenie Angela ta vegano pa 10 aña caba y a pesar cu su pareha, Jürgen Henriquez, no ta un vegano, Eugenie a dicidi pa lanta Leah Jurenie Henriquez cu e estilo di bida vegano. Di e forma aki Eugenie ta percura pa Leah lanta consciente cu e no ta e unico ser riba e mundo aki y cu no ta su bida so ta importante y mester balora, sino di otro tambe.
Farah Roos riba 19 september 2015 a bira mama y a duna luz na su yiu muhe Leiah Nadall, cu ta vegano for di su concepcion. No tabatin ningun duda cu hunto cu su pareha, Geomar Nadall, lo lanta nan yiu diferente. E estilo di bida vegano ta promove tur locual cu nan kier implementa den Leiah. Mas importante ta amor y compasion pa tur criatura.
E palabra vegano ta nifica, un persona cu no ta come ni uza e productonan cu ta contene bestia, manera; baca, porco, galiña, e productonan di lechi, webo, e productonan cu getest riba bestia, e productonan di cuero, etc. Un vegano ta come tur loke ta bin di tera y mata. Berdura, fruta, grano, noot, simia, legumes (tur sorto di bonchi). Mayoria producto vegano (berdura, fruta, bonchi y simia) ta fresco of organico.
FOCUS a acerca despues di un aña Eugenie y Farah pa haya un ‘update’ con ta bayendo cu e alimentacion vegano di nan yiu muhernan.
Eugenie: “Leah su alimentacion vegano ta bayendo hopi bon. Riba su mes e ta scoge pa come fruta y berdura. Si bo mester pone un slice di pizza y un broccoli, e ta scoge e broccoli. Ta cuanto mucha ta haci esey? Algo cu e ta gusta come awo, ta bacoba. E ta zona straño, pero e no tabata gusta e textura di bacoba. Pero awo, e ta STIMA un bacoba”.
Farah: “E alimentacion ta bayendo super bon, Leiah ta un healthy, happy, strong, thriving toddler. Wowo y djentenan fuerte. Su all-time favorites ta tur e platonan cu tin boonchi aden, vooral chickpeas, e ta encanta Hummus, Oatmeal, Batata den forno, olijfi, awakati , kale, broccolli, appel, banana y strawberries. Awor e ta mas consciente, e ta puntra hopi y ta haya straño con otro hende ta come bestia”.
