FALTA 4 DIA PA UN DI E EVENTONAN REAL MAS GLAMUROSO

E matrimonio di Prins Harry y Meghan Markle, diasabra awor 19 di mei na St. George’s Chapel na Windsor Castle, ta un acontecimento cu e pueblo Britanico ta sperando cu gran entusiasmo, pasobra lo e bira un fecha cu lo pasa pa historia. E enlace matrimonial di un miembro di realesa Europeo y un actriz Mericano ta un hecho, cu no ta pasa tur dia.

E pregunta cu mas a surgi tabata: Con realeza a acepta un muher divorcia? Divorcio ta un echo di bida na tur parti mundo, pero algun decada pasa esaki no tabata pa e famia real Britanico. P’esey ora a anuncia e compromiso di Prins Harry y Meghan Markle: un muher divorcia, tabata un gran revelacion. E lo casa cu un muher, cual su historia romantico por tabata un obstaculo den e generacionnan real antiguo, unda ta rechasa divorcio y te poco tempo pasa, tabata prohibi e matrimonio di un persona divorcia si su ex casa ainda tabata na bida. Sinembargo cu e cambio di e reglanan di iglesia na Inglatera, cu un monarca ta sirbi como gobernante supremo, esaki por a bira realidad.

Prome cu e fecha di 27 di november cu Prins Harry y Meghan Markle a anuncia oficialmente nan compromiso real, e pareha a pasa den un temporada di conoce otro leu for di e luz publico. E bida di Meghan como actriz di Suits na Toronto y con el a envolve su mes pa logra e soño di casa cu un prins den bida real.