Un dia despues cu Inés Zorreguieta, ruman muhe di Reina Máxima, a ser haya morto na su cas na Buenos Aires na edad di 33 aña, su famia, amigo y amistadnan a despidi di dje den e cementerio Memorial del Pilar na Buenos Aires, Argentina.
Rey Willem-Alexander y Reina Máxima hunto cu e prinsesnan, Alexia, Amalia, Ariane a biaha riba un vuelo di KLM pa Buenos Aires. E imagennan a mustra con tristo y conmoví Reina Máxima tabata despues di e morto tragico di su ruman di mas chikito. Reina Máxima a yega e santana cu flor den su man y cu un dolor inmenso refleha riba su cara. Rey Willem-Alexander hunto cu e tres prinsesnan; Alexia, Amalia y Ariane a mustra tambe hopi afecta pa e morto inespera di Inés Zorreguieta. Entre e prinsesnan esun cu a mustra mas afecta tabata prinses Alexia, cu ta e segundo yiu muhe di e pareha real. Prinses Amalia a keda henter ora band’i su mama durante e ceremonia mientras prinses Ariane, cu Inés tabata su madrina, a keda tur momento hunto cu su tata.
Inés tabatin 16 aña tempo cu Máxima a casa cu e tempo ey Prins Willem-Alexander dia 2 di februari 2002. E tabata un di e bruidmeisjes di su ruman muhe, cu ta 13 aña mas grandi cu ne. Semper tabatin un laso hopi special entre e dos ruman muhenan. Máxima a scoge Inés pa ta e madrina di bautismo di prinses Ariane na october 2007.
E causa di e morto di Inés Zorreguieta ainda ta bou investigacion, cu a conmociona Argentina y specialmente e famia di Reina Máxima. E mama, Maria del Carmen Cerruti Zorreguieta, tabatin mester atencion sicologico despues di a haya e curpa sin bida di su yiu muhe den su vivienda. El a bay busca Inés hunto cu un amiga despues di purba tuma contacto cu ne door cu e no a presenta na trabou. Segun informe cu a sali den prensa na Argentina cu Inés Zorreguieta tabata sufri di depresion.
