E noticia di fayecimento di Ruben Trapenberg, a causa un sentimento di inmenso tristesa cerca hopi hende na Aruba. Desde e momento cu a bira conoci cu Ruben a fayece, un cantidad di persona a cuminsa post riba nan pagina di facebook. Entre nan diferente di su coleganan, amistad y personanan for di diferente sector di Aruba, cu a demostra nan aprecio y respet pa Ruben Trapenberg.
Ruben a tene su publico semper na haltura di e desaroyo di su enfermedad, cu for di aña pasa na october a cuminsa duna señal di su existencia. Durante un entrevista na Telearuba el a splica cu despues di e temporada di eleccion y di debate, net prome cu su vakantie ta bay cuminsa, cu riba un anochi el a haya dolor cu a cuminsa 10or di anochi y cu a dura te 6or di mainta. E dolor a sigui dia tras dia, el a bay dokter di cas y el a informa Ruben cu e tin cu haci test. Na hospital el a haya indicacion cu tabata cancer debi cu el a haya un remedi anti-cancer, cu tabata baha e intensidad di e dolor cu tabata rond di su bariga. E resultado tabata cu Ruben tabatin “non-hodgkin lymphoma” y e mester a bay Hulanda pa sigui su tratamentonan y lucha contra cancer. Su famia semper tabata band’i dje, su casa Marian y su dos yiu muhernan, Stacy -Ann y Ann-Marie.
Ruben a bolbe Aruba na mei y el a bisa den e entrevista cu e tabata hopi contento cu e ta bek y cu e ta spera cu ta pa un largo tempo debi cu cancer no ta cura, pero e cancer ta drumi y bou control. E tabata sinti’e fantastico y no tabata tumando niun remedi. El a cuminsa traha bek na Hits 100FM y na Telearuba siguiendo su rutina aunke un tiki mas trankil riba conseho di dokter pa evita stress y tambe solo. Sin embargo destino tabata otro y Ruben a fayece di un ataca riba madruga dia 3 di juli.
Nos a tuma contacto cu su colega di hopi aña den medio di comunicacion, Tito Lacle, y el a duna nos e siguiente comentario: “Mi conoce Ruben Trapenberg mas di 25 aña. E tempo ey ainda Ruben tabatin cabey largo. Su estilo semper tabata diferente: su forma di pensa, di mira cos. Nos tabata di acuerdo riba mayoria cos. Parce cu nos dos tabata un ‘otro breed’. Esey a haci nos conexion asina fuerte y unico. P’esey tambe Telearuba a acerca nos dos na 2009 pa haci e ‘talk show’ estilo ‘Pauw & Witteman’ cu a haya e nomber Lacle & Trapenberg. Rapidamente e programa a bira e programa mas mira durante campaña electoral. Ruben tabata semper hopi critico pa loke ta trata mi trabou, pasobra e tabata spera mas di mi . Semper e tabata honesto y straight cu mi y viceversa. Nos por a bisa otro tur cos, sin rabia cu otro. Aunke cu mi tabata sa di su malesa, mi tambe tabatin speranza pa mehoracion y p’esey mes su morto, un poco repentino, a dal mi duro. Aruba a perde su miho presentador di noticia”.
Ruben Trappenberg tabata riba portada di FOCUS hunto cu Tito Lacle durante e temporada cu ambos tabata presentador di noticia na television. Despues Ruben tabata un biaha mas riba e portada di juni pa Dia di Tata hunto cu su yiu muher mayor Stacy-Ann tempo cu e tabata chikito. Pa su estilo y elegancia, Ruben a ricibi e reconocimento como FOCUS Best Dressed. Ruben Trapenberg ta un persona carismatico den medio di comunicacion y farandula, cu semper a inspira hopi respet y admiracion pa su profesionalidad y personalidad. FOCUS ta extende su sentido pesame na Ruben su casa, yiunan, famia, colega y amistadnan. Cu Ruben sosega na paz den brasa di Señor.
