Diaranson anochi e popular cantante C-Zar Olarte a lansa oficialmente e proyecto “Shine E Light”, cu a tuma mas cu 1 aña pa produci esaki. Hunto cu un team nan traha riba e cancion cu no ta esun regular cu ta scucha na radio, pero e ta un cancion cu un mensahe. E videoclip “Shine E Light” ta graba estilo pelicula riba un nivel internacional, y ta algo unico cu no ta custumbra di mira na Aruba, segun e palabranan di Mark-Benson Denz.
Prome cu e estreno di e proyecto musical y videografico, “Shine E Light”, C-Zar Olarte a splica cu e cancion ta un idea cu a surgi di Rich Aruba (Falco), pa trece un mensahe specialmente pa e hubentud di Aruba. Momento cu el a acerca C-Zar cu e preocupacion di loke ta sosode awendia, di esunnan cu ta haci maldad pa yega na placa facil of ora bo ta down cu bo por wordo cumpra lihe. E otro fenomeno di loke ta ser papia awendia di dje ta; “Illuminati”, cu C-Zar mes tin su experiencia personal alrededor 4 biaha cu esaki. E concepto treci dilanti pa Rich Aruba y cu C-Zar Olarte su experiencia personal, a crea e conexion pa nan a drenta studio conhuntamente cu Awa Ras. E idea- y pensamentonan di e tres talentoso artistanan aki tabata e inspiracion pa cuminsa skirbi e letranan di e cancion “Shine E Light”, cu e mensahe cu bo mester traha duro cu fe den Dios pa yega leu, persevera, kere den bo talento y sigui dilanti pa yega bo meta.
Awa Ras conoce C-Zar Olarte pa hopi aña caba y e ta hopi orguyoso di e produccion, cu ta trece un mensahe dilanti pa asina caba cu loke ta manipulativo. Oldric Fernandes cu tin un rol den e videoclip tambe conoce Cesar pa hopi aña y el a duna su sosten completo pa realisacion di e proyecto. E videoclip cu a ser lansa den presencia di e invitadonan na Terraza na New Olde Molen ta riba YouTube y por ser mira tambe via e website www.focus.aw
