Creativo, amabel y afectuoso cu un beyesa natural y a pesar cu ta 21 aña pasa, desde cu e tabata riba e portada di FOCUS, Edwirah, ta luci mesun fabuloso. Edwirah ta sinti cu awendia a pesar di tur locual el a pasa aden, el a sa di surpasa hopi obstaculo, cu awe cu su 37 aña, e por ta un entrepreneur exitoso, banda di ta un mama soltera.
Edwirah Zayda Zayenne Brete a naci na Aruba dia 30 januari 1981. Si e mester haci un recompilacion di su añanan den modelahe, e lo describi e epoca ey di su bida como e temporada mas dushi di su hubentud. E tabata constantemente ocupa y el a cera conoci cu hopi hende. Despues di a gana su prome competencia di Youth Model, el a haya e oportunidad di traha varios comercial, haci diferente photoshooting y desfila pa varios show di moda grandi, manera Star Model. Un momento inolvidabel pa Edwirah como mama tabata cu despues di hopi aña, el a subi pasarela atrobe y e por a comparti e dia aki cu su 2 yiu muhenan pa e Summer Breeze Collection by Gigliola. Edwirah ta mama di tres yiu: Kelly-Ann Odor (20), Karen-Ann Odor (17) y Carlson Odor (12). Den edicion di FOCUS pa e luna aki por lesa un entrevista amplio cu Edwirah con e tabata, pa ta un mucha muher liber sin preocupacion, pa enfrenta maternidad cu 17 aña di edad.
