Pa inicia e ultimo kwartaal di e aña aki, revista FOCUS tin riba su portada Lorena Bikker, cu ta ilustra su bunitesa y simplicidad den e edicion di october. Algun aña pasa ya caba Lorena tabata riba e portada hunto cu su casa Andin Bikker y su dos yiunan; Tiffany y Aliah. Den su entrevista e ta relata cu e transicion di Colombia pa Aruba en berdad no tabata facil. Pero el a realisa cu e tabatin un oportunidad, pa bay dilanti.
Lorena a compronde e importancia di adaptacion y respet pa Aruba su custumbernan, cultura y idioma. Despues di tres luna bibando riba e isla aki, el a siña papia Papiamento y esey ta nan idioma den nan hogar. Lorena Bikker ta considera su mes un hende muhe bendiciona, sincero, perseverante, cu caracter fuerte y reserva. E ta un persona cu semper ta bisa loke e ta sinti y ora e tin un meta su dilanti, e ta lucha p’e. Sin kita afo, Lorena ta un ser femenino cu ta dispuesto pa siña y adapta, pero semper e lo keda su mes. Conoce Lorena un poco mas di cerca den su entrevista den edicion di FOCUS di october.
