Kiwanis Club of Palm Beach Aruba recientemente a efectua instalacion di su Directiva pa 2018-2019. A logra crea un anochi unico unda a refleha e seriedad di e ocasion y alabes cu un toke di spontanidad. Roy Mezas tabata MC pa e anochi y tin un amplio experiencia pa locual ta e progama di instalacion di directiva di Kiwanis.
Den e ballroom di Hyatt tabatin presente shete Presidente di clubnan di servicio na Aruba. E presencia di e hobennan cu ta pertenece na e diferente “Service Leadership Programs” di Kiwanis tambe tabata notabel. Deyanira Janssen-Frank, esposa di Michel, a haci e “salute to the ladies” cu ta sostene nan pareha y duna nan espacio pa haci nan trabou como voluntario.
Despues di e dinner, a pasa pa e parti oficial di e programa, cu ta e ‘discharge’ di e Directiva saliente. Prome cu e ‘discharge’ a hiba palabra Ted Johnson, presidente saliente, cu den su discurso a elabora riba un aña exitoso y a gradici e miembronan cu den un of otro forma a contribui na esaki. Despues, Giantonio Muller, Immediate Past Lieutenant Governor, a ‘discharge’ e Directiva saliente pa siguientemente pasa pa instalacion di e Directiva 2018-2019.
Despues di e ‘discharge’ a toca e honor na, Roy Mezas, Distinguished Past Lieutenant Governor y Robert Spellen, Governor Elect EC&C District 2018-2019, pa pin e ‘Directors’ y ‘Officers’ di Directiva 2018-2019. Alabes a instala un miembro nobo, Carlos Tapias, cu tabata acompaña pa su casa Isha Tapias. Den su discurso, Michel, cu a join e famia di Kiwanis na aña 2010, a destaca e influencia di su mayornan riba su decision pa dedica su mes na trabounan voluntario. Su tata, Piet Janssen, ta un ex-Presidente di Rotary Club of Aruba y a dedica mas cu 30 aña na trabou nan voluntario. Su mama, Helen, ta un ex-Presidente di Women’s Club of Aruba y tambe a dedica hopi aña na trabou nan voluntario. Gladys, pareha di su tata, ta un ex-Presidente di Quota International Club Aruba. Michel a menciona tambe di ta hopi orguyoso di su dos yiunan cu ambos ta forma parti di Builders Club Mon Plaisir (un Service Leadership Program di Kiwanis) na edad di apenas 12 y 14 aña. Michel a cera su discurso gradiciendo su esposa y su yuinan pa nan sosten.
