Revista FOCUS cu su toke festivo pa cera aña 2018 tin riba su portada e beyesa Shanty Kanhai, cu ta duna e briyo glamuroso na e edicion di fin di aña, cu tin mas pagina pa mesun 8 florin. E aña aki pa di 24 aña consecutivo, cu revista FOCUS ta haci entrega di su reconocimentonan, y duna merito na e personanan cu a destaca den nan ramo di trabou y cu ta un ehempel of un inspiracion pa otro persona. E personanan reconoci e aña aki ta Sharon Fränkel-de Cuba, Ronchi de Cuba, Louise Rafeal-Croes, Odo Frangie, Gwendolin Kock-Croes y Karena Maduro.
E cover model, Shanty Kanhai, Miss Teen Earth 2018, ta conta di su experiencia na e certamen y ki ta e prome cos cu a pasa den su cabes, e momento cu el a wordo anuncia como ganadora. Shanty como“Generation Z” ta duna su punto di bista tocante tecnologia y social media. Despues cu e baha su corona di Miss Teen Earth na 2019, un dia e lo wak su mes riba e stage di Miss Universe ta grita nomber di su isla ARUBA. Pero prome cu esey e ta dedica na su estudio, y prepara su mes mental- y físicamente. Momento cu e ta sinti su mes 100% cla, e lo bay pa su siguiente reto den e mundo di beyesa.
Personahe FOCUS 2018: Sharon Fränkel-de Cuba, su trayectoria profesional a cuminsa na 1985 na Hulanda y na 1990 el a inicia su carera den e mundo bancario na St. Maarten. Durante e añanan 1990 te cu 2004, Sharon a ocupa diferente posicion y 2004 Arubabank a acerc’e y el a join e famia di Arubabank, unda el a cuminsa como Manager Risk. October 2005 el a haya promocion pa Executive Director, formando parti di e team ehecutivo di banco y 5 aña despues, a promove pa Managing Director, conhuntamente cu su colega Managing Director formando e Management Board di Arubabank.
FOCUS Renconocimento Special 2018: Dr. Louise Rafeal-Croes, cu desde cu el bin bek Aruba na 1997, manera el a caba cu su estudio pa pediatra, el a join Dr. Joel Rajnherc. Na aña 2004 nan a bay den servicio di hospital y cu tur su otro coleganan actual. Recientemente tabatin e prome congreso grandi y exitoso tocante abuso di mucha “Kibra e silencio”. Abuso di mucha semper tabatin hopi, pero awor comunidad ta señala y alerta e stakeholders y esaki ta un resultado di cierto negligencia di generacion tras di generacion y Louise ta confronta e casonan aki diariamente. Como dokter di mucha, Louise ta sinti cu mester enfoca riba educa e profesionalnan con pa señala y documenta e casonan.
FOCUS Moda 2018: Ronchi de Cuba, tin su historia den moda como tambe den modelahe na Aruba y sigur a influencia y impacta bida di hopi hende. Su carera den e mundo di moda, sigur por defini cu e palabranan: creatividad, versatilidad, determinacion, perseverancia y no por keda sin uza “filter”, pa sobrebibi den e medio aki, cu ta sumamente importante, mirando cu mester por filtra e opinion- y comentarionan di otro y sa bon kico uno ta considera valido y kico bo ta ignora completamente. Ronchi ta posee un curason grandi, sincero y bondadoso y semper ta cla pa yuda, te unda cu e por.
FOCUS Fashionista 2018: Odo Frangie, e tabata un cambio hopi grandi tempo cu Odo a muda pa Aruba hunto cu su famia. E famia a sa di adapta na Aruba su custumbernan y combin’e cu nan mesun cultura Libanes. E influencia Arabe mas grandi den Odo su estilo ta e parti di makiyahe. E gusta haci su wowonan estilo Arabe y Egipcio, aplicando e makeup drama manera Cleopatra. E wowo e liner largo grandi, pinta cu e colornan fuerte manera royal blue y preto. Cu e makeup aki e ta sintie su mes. Odo ta un fashionista cu ademas ta encanta cushina y su specialidad di mes ta cuminda Arabe.
FOCUS PANTENE INSPIRACION 2018: Gwendolin Kock –Croes, miho conoci pa ‘Wendy’, for di su infancia, e ta hinca den mundo di landamento y asina tambe el a conoce su casa Andy Kock, di cual hunto nan tin dos yiu muher: Flory y Gwenny, cu tambe ta hopi conoci den e mundo di landamento, tanto nacional como internacional. Wendy dia 11 di november a landa hunto cu 4 otro landador di Venezuela pa Aruba. Wendy a land’e den 10 ora y 2 minuut y el a yega net na e rif poco pariba di Renaissance Island. E tabata hopi emocional pa Wendy, paso ta prome biaha un hende muher ta logra landa di Venezuela pa Aruba.
FOCUS PANTENE INSPIRACION 2018: Karena Maduro, despues di un photoshooting pa un amiga cu t-shirts di “inspirational quotes” pa curvy ladies, e idea a nace pa Karena traha un closed group, pa nan por comparti tur loke nan ta haya pa inspira otro muher plus size. Awe e grupo ta consisti di mas di 2600 hende muhe, unda no Karena so, pero tur esunnan cu kier comparti un storia, un lucha of un logro. Aparte di e grupo di FB, nan a cuminsa organisa algun actividad, unda nan ta reuni, pa asina e sosten yega pocopoco na un nivel mas personal. Di e grupo aki tambe a nace Viva Voluptuous Aruba Models, cu ta unicamente p’e muhernan plus size.
