Ta mama kiermen duna bo curason completo y entrega bo forsanan cada dia pa saca bo yiunan padilanti y siña nan biba. Ta mama kiermen tin un motibo di existi pa resto di bo bida, paso bo kier probecha y experiencia cada momento lo maximo. Bo lo desaroya sentimento cu bo ta haya ora bo ta wak bo yiunan crece, sintiendo dicho y nostalgia, ora cu nan avansa, tumando e pasonan grandi pa bida. Si tin un amor cu nos por yama berdadero, ta e amor sincero di un mama. Ta un amor cu na mesun momento ta eterno y infinito. En realidad, ta mama ta implica sigui e pasonan di un maestro chikito, e yiunan, te ora cu nan bira grandi. Djis di existi y sin sa, e yiunan ta siña e mamanan pa stima di un manera incondicional.
FOCUS ta celebra Dia di Mama y a comparti esaki aki cu algun mama den FOCUS, contando nan experiencia. E siguiente pregunta di nan entrevista nos a scoge pa publica den News Flash: “CUA TA E REGALO MEMORABEL CU A RICIBI PA DIA DI MAMA”
Andreina Ponson-van Romondt y su yiunan: Brandon Ponson (3) y Aliya Ponson (1 aña y mei)
“Mi a yega di ricibi un bunita obra di arte cu mi yiunan a traha na scol. Pero, e cos di mas memorabel tabata e bunita poema cu nan a presenta na mi”.
Etlien Croes y su yiu: Lixiën Dijkhoff (16)
“Mi regalo inolvidabel ta un carchi creativo cu Lixiën mes a traha, ora e tabatin 9 aña. Lixiën a skirbi e siguiente mensahe: “For the world’s greatest mom. Mom, you’re not the perfect mom, but you’re all I want”.
Amerey Noemy Tromp y su yiu: Ceanna Genesis Richardson (10)
“Ceanna ta hopi creativo y gusta traha cos riba su mes. Esaki no ta pasa riba Dia di Mama so, ya cu e sa haci esaki tur biaha cu e ta sinti cu mi tabata hopi druk na trabou y cu tin biaha mi ta lubida riba mi mes”.
Maria Geerman-Esguerra y su yiu: Christopher Geerman (28)
“Tabata na 2013 unda manera riba e protret, mi yiu ta hiba mi altar den misa, pa entrega mi bek na su tata pa nos uni bek den matrimonio”.
Mayren Heeringa y su 2 yiunan: Ryel Bisslik (9) y Roma Bisslik (6)
“Ami semper ta encanta loke nan ta traha na scol. Esey so ta suficiente pa mi, paso mi sa cu esey ta traha cu hopi atencion y nan ta asina orguyoso, ora nan ta duna mi Dia di Mama ora mi lanta”.
Radinka van Vuurden y su yiu: Stefano van Vuurden (4)
“Pa mi e regalonan di mas leuk ta, esun nan cu mi yiu ta traha pa mi. Mi gusta wak e amor di dje, expresa door di su mes y esey nan ta mi faboritonan”.
Shandy Petro Suarez y su yiu: Jayven Maduro (6)
“Pa mi semper ta e regalitonan simpel, cu mi yiu ta bini cu ne di scol. Y tur dia mi ta bendiciona caba cu e regalo di mas bunita cu bida por a duna mi, cu ta Jayven”.
Jennifer Nicolaas y su yiu: Chloë-Nicole Dirks (6)
“Indudablemente Chloë mes, paso el a haci mi mama. Tur aña, segun e ta crece, e regalonan y e gestonan cu e ta haci, ta bira mas leuk. ‘Breakfast in bed’ made by Chloë ta un topper”.
Magalie Curiel y su yiunan: Gerrick (26) Bontekoe y Britney Bontekoe (19)
“Sigur tabata mi prome desayuno riba cama traha pa nan mes y semper lo mi corda nan obranan di man cu nan tabata traha na scol, cu hopi amor y dedicacion”.
Lay-Hing de Kort y su yiunan: Shawndrick Oduber (13) y Amelie de Kort (2)
“E regalonan cu e muchanan tabata traha na scol. Pa mi e ta un demostracion di nan desaroyo y esey ta algo, cu mi ta kere cu nos tur como mama, ta desea di wak nos yiunan desaroya den un manera positivo.
Gilliany Briesen-Oduber y su yiu: Brayden Briesen (7 luna)
“Durante mi embaraso aña pasa pa, dia di mama, mi casa a manda mi un carta skirbi den nomber di nos yiu. E carta tabata hopi bunita y sentimental, specialmente na e momento di embaraso, unda emocionnan ta halto. Aunke cu esaki ta un bunita recuerdo, al final di dia, e regalo di mas bunita semper lo keda mi yiu”.
Nuraisa de la Cruz-Lispier y su yiunan: Albert-John (6) de la Cruz y Ali-Jade de la Cruz (2)
“E regalo di mas memorabel cu mi tin ta di mi yiu homber. Un dia di mama mi a haya un vaas, cu el a traha cu su juffrouw di peuter y te dia di awe mi tin e den mi camber”.
Mayrene Ras-Croes y su 2 yiunan: Eva Mae Ras (3) y Alessia Ras (1)
“Un regalo memorabel cu mi a ricibi pa Dia di Mama ta e prome ‘arts and crafts’ cu Eva Mae a traha p’ami; un imprint di su man cu tabata representa un flor”.
Jetty Croes-Wever y su morocho: Theo Croes y Pieter Croes (4 luna)
“Esaki ta bay ta mi prome celebracion di Dia di Mama. Mi a soña hopi di ta un mama un dia. Danki na ciencia (IVF) y hopi oracion mi deseo a keda cumpli. Pa mi, tur dia cu mi baby boys, ta un dia special”.
