Irina Croes a causa un impacto total riba e portada di juli 2015 den su bikini ilustrando su escultural figura. Desde cu Irina a wordo corona como Miss Aruba su bida a cambia completo, y a bira un role model den nos comunidad.
Irina ta un ex-miss cu semper a mantene su figura y for di jong ta practica synchronized swimming cu ta entre su hobbynan ademas di CrossFit, core y musica. Aunke Irina no ta e tipo di persona cu ta pone resolucion na comienso di aña, el a dicidi cu e kier cuminsa cu CrossFit na januari 2015. E ta train un averahe di 4 biaha pa siman y ora e tin cierto metanan pa su curpa of un meta manera coremento pa un marathon, e lo train te asta 6 biaha pa siman. Tin momento door di drukte cu e por baha tambe, pero loke Irina ta gusta di Crossfit ta cu nunca e ta fada. Aunke tin biaha e kier tuma break, despues di 1 siman caba e kier bay bek paso e ta haya su falta.
El a wak cambio hopi lihe na su curpa. Prome e tabata mester a dedica hopi mas tempo den training pa ripara esaki. Sin embargo cu Crossfit no! Den 6 siman ya el a cuminsa ripara cambio. “Mi ta sintimi hopi “strong”. Pianan y lomba ta wordo bon forma. E ambiente di motivacion pa un cu e otro cu e deporte tin, ta pusha bo pa bira cada dia mas y mas miho. Nos ta un famia, manera nos ta bisa”.
Despues di cada biaha cu nan haci un les WOD (work out of the day) nan ta ‘high five’ y complementa otro y asina motiva otro. Den e deporte aki, e ta sinti cu e no mester ta un competencia sino mas bien un inspiracion pa otro cu ta bo compañe di entrenamento. E no ta solamente pa tin un curpa bunita sino tambe e satisfaccion cu bo ta bira cada dia miho y kibrando bo mesun ‘personal records’.
Irina su funcion ta como trahado social di scol pa 9 aña caba y su trabou ta encera guia hobennan cu tin cualkier problema riba tereno social emocional. E ta yuda nan tambe den cualkier cos cu por ta stroba nan carera di scol. Irina ta gusta traha cu e hobennan y e ta siña di nan tur dia.
E impacto positivo cu deporte tin den su bida e ta purba di transmiti esaki tambe na e hobennan y ta uza esaki como conseho na su studiantenan of otro hendenan cu sa pidi’e conseho. Den su experiencia cu su deporte e ta bisa cu e ta duna bo un cierto satisfaccion, y e ta los endorphines den bo curpa cu ta automaticamente haci bo happy. Y esey ta bon pa ora bo no ta sinti bo emocionalmente stabiel. Esaki a yuda Irina hopi durante su momentonan menos facil den su bida.
