Revista FOCUS ta inicia 2019 cu un portada cu ta refleha Amor y Union, cu e matrimonio di Sonaly Acosta y Jerusho Fernandez. E pareha aki cu na aña 2015 tabata “Focus Best Dressed”, ta dos persona hopi activo unda ambos ta gusta ta fit. Esaki a keda transmiti tambe riba e portada cu e fotografo David Santiago a realisa conhuntamente cu e pareha na Medellin, Colombia dia 16 di december 2018.
Na un lugar, unda cu tanto Sonaly Acosta como Jerusho Fernandez ta encanta y cu tin un bista riba ful Medellin, ta netamente e espacio unda nan a ricibi e bendicion di nan matrimonio den compania di nan dos yiu muhernan; Athina y Viva, famia y e amistadnan di mas cercano. Nan a sinti nan mes masha honra cu un gran parti di e invitadonan tabata presente riba e gran dia aki. E escogencia pa ricibi e bendicion di nan union na Medellin ta, paso cu ademas e ta mane nan di dos cas, aki ta unda nan a ricibi e miho noticianan. Jerusho a propone Sonaly den un kapel di Divino Niño, unda nan tin hopi fe den dje na Medellin. E momento cu Jerusho a propone Sonaly matrimonio, e tabata sa cu e gran dia aki mester ta celebra y bendiciona pa e ciudad di eterno primavera, pa trece eterno luna de miel! Den edicion di FOCUS di januari por lesa e entrevista extenso cu e pareha y un reportahe fotografico espectacular.
