Den edicion di Revista FOCUS di januari tin dos enlace sumamente bunita. E pareha Elisa Chieh Chen Tang & Albert Etienne Lake y tambe Isabella Fortich & Michel Saade. Cada un di e parehanan di un storia di amor unico cu a culmina den matrimonio.
Elisa Chieh Chen & Albert: Na aña 2003, durante un competencia di Taekwondo, Albert a bay wak un prima di dje competi y eynan el a wak Elisa pa prome biaha. Elisa tambe tabata pratica e deporte di Taekwondo. Despues di 15 aña di noviazgo, Albert y Elisa a dicidi pa formalisa nan relacion y riba 22 di november 2018, nan a casa pa civil y dia 24 di november nan a drenta enlace matrimonial na Pro Cathedral San Francisco de Asis.
Con Albert a ‘pop up’ e pregunta? Albert ta un hende hopi reserva y no ta gusta mucho atencion riba dje. El a didici di puntra Elisa pa nan casa riba su cumpleaños 12’or di anochi, 27 november 2016. E siguiente dia nan a celebra cu nan famia y nan amistadnan mas cerca.
Isabella & Michel: Nan no por a imagina, cu e dia cu nan a conoce otro, amor lo por a surgi y finalisa den un storia di amor unico. Tur esaki a inicia den zomer di 2014, ora cu ambos tabata studia na e mesun universidad. Un amigo comun a invita Michel, pa bay na e cas di Isabella y for di e momento ey, e kimica entre nan dos a flui mesora.
Con Michel a ‘pop up’ e pregunta? E famia tabata di bishita na Aruba pa prome biaha. Michel no por a laga e oportunidad bay perdi di pidi su man, na un lugar asina perfecto y special manera Aruba. El a bisa Isabella cu nan ta bay pasa un atardi den e boto di un amigo. Mientras e tabata distrae Isabella, nan famianan tabata abordando un catamaran, unda nan a keda warda, pa wak e propuesta.
Por lesa e storia completo cu tur detaye y potretnan fabuloso di e ceremonia y celebracion den edicion di FOCUS di januari. Solamente pa 8 florin!
