E proyecto ‘Walk for Paws’ organisa pa un grupo di studiante di University of Aruba, cu tabatin como meta pa recauda fondo pa Aruba Animal Shelter, a resulta den un exito grandi. Nan a surpasa e meta di e fondonan cu nan a spera di recauda, y ta hopi contento cu e logro unico aki. Un cantidad grandi persona a presenta hunto cu nan mascota pa participa na e ‘fun walk’ di 3K, cu a sali for di Fisherman’s Hut na Malmok. E simannan prome cu e actividad a tuma lugar, e studiantenan a bende ticket na diferente localidad y riba e diadomingo atardi a yega mas persona pa registra pa cana hunto cu nan mascota. Esaki a demostra cu e interes tabata grandi di parti di e publico y cu a resulta un exito den participacion.
Durante algun siman e compañeronan di klas; Zia Habibe, Yaella Lopez, Jo-Anne Noguera, Deandra Arends, Cindy Quintero y Kim Balcera tabata hopi activo cu organisacion di ‘Walk for Paws’ tanto cu bendemento di ticket como acercando e patrocinantenan pa contribui cu nan proyecto. Nan a scoge Aruba Animal Shelter pa realisa e proyecto aki door cu nan tur tin mascota, cu nan ta duna e cariño y cuido necesario. Nan deseo ta pa no mira niun cacho mas riba caya na Aruba, ya cu e cachonan aki ta termina den e ‘Kill Cage’.
Na e actividad e team di boluntario di Aruba Animal Shelter tabata presente cu nan stand pa bende mercancia pa recauda fondo. Riba e Facebook di Aruba Animal Shelter nan a post nan gradicimento na e organisadornan di ‘Walk for Paws’ y cu nan ta orguyoso di e grupo di mucha muhernan aki, cu a colecta un fondo considerabel pa e shelter. Un gradicimento special ta bay na Just4Pet, Shreks Pet Service, ECO DMS, IBISA, Fluffy Paws Exclusive, Aruba Dog Training y tur e esunnan cu a contribui cu nan donacion na Super Food pa duna sosten na Aruba Animal Shelter. Cu e fondonan recauda sigur Aruba Animal Shelter por haci bon uzo di dje pa nan sigui eherce nan trabou como boluntario na bienestar di e animalnan domestico na Aruba.
