E experiencia di Miriam Contreras den e certamen di Sra. Turismo Mundial tabata uno sigur inolvidabel. El a traha duro pa e titulo dedicando hopi ora te laat anochi na training pa pasarela, mirando cu e no tin experiencia riba e tereno aki. El a disfruta di un siman yena cu actividad di mainta te anochi, caminda el a cera hopi amistad. E unico cos cu e tabata pensa cu no ta Miriam su nomber, pero ta Aruba y el a hacie di curason pa su isla.
Miriam ta un mama soltera di 2 yiu, un mucha muher di 16 aña y un yiu homber di 19 aña. E ta un persona hopi outgoing, humilde y cu gusta yuda unda cu e por. E deportenan cu e ta practica ta running y basketball. E ta traha na AZV unda e tin 17 aña laborando y primordial den su bida ta su famia cu ta tur cos pe. Pa loke ta e tereno di beyesa Miriam a haya e oportunidad pa representa Aruba 5 aña pasa na e certamen Sra Hispanoamerica na Sto Domingo caminda el a keda 2nd R-Up, Miss Fotogenica, Mihor Trahe Fantasia y Mihor Curpa. Aparte di esaki nunca el a participa den un certamen di beyesa y awor cu el a participa pa Sra Turismo Mundial 2019.
Miriam ta conta cu George Winterdaal a puntre for di aña pasa pa e participa na e certamen y su contesta tabata un ‘Big NO’. E aña aki februari atrobe, sin embargo su contesta no a cambia, te cu 1 luna prome cu e certamen George a yama y bise: “Miriam mi echt ta confia cu bo por y mi kier bo bira nos Sra Turismo Aruba”. El a dicidi di tuma e reto cu e apoyo di Endy Croes, Roberto Avalo y Edson Everon. E anochi di e certamen, Miriam a sinti hopi sigur di su mes riba stage, pero ora el a scucha e resultado, el a yora di alegria! E unico cos cu e tabata pensa ta pa coy su bandera di Aruba y brasa su mama cu su yiunan. E ta corda cu e tabata tembla di nervio e momentonan prome cu e resultado final a bira conoci. Den su opinion cu e punto sigur mas fuerte di su participacion tabata su pasarela. Segun e comentarionan, el a presenta su trahe di gala cu hopi elegancia riba stage, cu por cierto a gana Mihor Trahe di Gala. E reaccion tabata super great unda cu cada bes cu Miriam a sali riba escenario, Cas di Cultura henter tabata grita masha hopi mes. Pabien Sra Turismo Mundial!
