Como artista invita Gustave Nouel ta expone te dia 9 di september un exposicion individual di Jazz-Art den Slot Kleverkamp na Deventer. E ta participando tambe hunto cu otro artistanan famoso Hulandes na un exposicion nacional na Ruurlo te dia 22 di juni. (www.mathildeinruurlo.nl). E obranan di e artista Arubiano a impresiona Jos van Gils, editor di e revista nacional 50Vitaalplus asina hopi, cu el a ofrece e Arubiano promocion nacional cu un articulo grandi den su edicion di mei/juni.
Ultimo añanan Gustave Nouel hunto cu su amigonan profesional, a entama un proyecto interdisciplinario aspirando calidad internacional den forma di un buki artistico den cuater idioma titula ‘Maternidad’. E buki tin como base e cuadronan cu Nouel a pinta durante henter e proceso di embaraso di modelo y actriz Arubiano Zuleika Coffie, te despues di nacemento di su yiu muhe Lilian, compartiendo su pensamento y reflexion maternal.
Intencion ta pa presenta e buki e aña na Biblioteca Nacional di Aruba. Relaciona cu e celebracion di 60 aña Biblioteca na Aruba, Nouel a ser invita na 2009 pa duna un exposicion, workshops y otro actividadnan. Esaki tabata un proyecto exitoso hunto cu Universidad di Aruba caminda Gustave Nouel a duna MasterClass. E biaha aki tin interes explicito na Aruba pa un presentacion di e pinturanan cu a ser publica den e buki (sea digital of traditional).
E buki ‘Maternidad’ lo wordo publica/presenta pa LM publishers y Gustave ta spera di por presenta e buki efectivamente na Aruba hunto cu Zuleika Coffie y e otronan cu a coopera. Contando riba suficiente apoyo na Aruba y un team profesional encabesa pa Ramon Todd Dandaré, e presentacion di e buki ‘Maternidad’ na Aruba mester bira un exito. E buki aki den e cuater idioma mas papia na Aruba (Papiamento, Hulandes, Ingles y Spanjo), tambe por ta instrumental pa promociona Papiamento internacionalmente.
