Dos logro grandi den dos siman di tempo cu Endy Croes y N-Designz a score cu e corona logra den eleccion di Miss Youth Aruba 2019, momento cu Isabella Benschop a conkista e titulo maximo. Despues di e logro di Ileyna de Cuba como Miss Teen International Aruba, a sigui e triunfo di Isabella cu tambe conhuntamento cu N-Designz a conkista 10 premio. E sentimento di orguyo y gradecimento ta inmenso pa Endy Croes. Orguyoso di a mira Isabella crece di un hoben hopi ‘shy’, cu ta sali di e mundo di deporte, pa bira un dama cu un elegancia y porte na nivel di un Miss Universo. E ta hopi agradecido cu e mayornan di Isabella a confia ciegamente den N-Designz pa e preparacion completo di nan yiu mayor. Na mes momento e triunfo aki ta un celebracion di e trabou duro cu Isabella y e ekipo completo a haci.

PREPARACION

E preparacion di tanto Isabella como Ileyna tabata hopi extenso y intensivo. Tur 2 a wordo prepara pa ta damanan hoben cu hopi contenido y sigur di nan mes den tur situacion. Cu Isabella mester a pone un tiki mas enfasis riba su parti corporal y nos ta hopi Endy ta orguyoso di a mira Isabella baha 22 liber en total. Esaki a tuma hopi dedicacion y determinacion di Isabella su parti pa asina e tene su mes na e plan estricto cu e mester a volg. Nan mes tabata bay core cu ne pa ten’e motiva y enfoca riba su meta pa anochi final. Endy ta describi Isabella como un hoben cu di momento bo combersa cu ne, bo sa cu bo ta papiando cu un reina. Isabella por expresa su mes di un forma hopi sincero y honesto cu ta acapara curason. E ta gusta siña y ta semper habri pa mehoracion den cualkier area. Su caracter hopi rustig y alegre ta haci cu su coach, Deyanira Janssen-Frank, por a traha hopi facil cu ne pa a haci su manera di presenta su mes mas fuerte ainda.

IMPACTO

E impacto di Isabella ta uno cu a traha duro riba dje pa e saca e mihor proyeccion posibel riba escenario. Aki ta unda cu runway coach, Jeanique de Palm, a enfoca hopi riba dje cu Isabella. Un hoben di estatura admirabel, pero cu mester a traha hopi pa refina su pasarela y siguridad riba escenario. E trabou di 3 luna a duna su fruto. E trahe di gala cu Isabella a luci nos por bisa cu sigur tabata otro impacto absoluto. Como diseñador Endy a inspira su mes hopi riba e candidata su propio caracter y tambe pensando kico lo faborece e reina pa e resalta mas. El a warda pa Isabella a baha mas peso cu tabata posibel prome cu a diseña su shimis. Un siman prome cu anochi final e diseño a wordo haci, y Verena Lian hunto cu 3 ayudante a traha dia y anochi riba e shimis, pasobra e decoracion mester a wordo cosi full riba e base di e shimis. E color blanco pa e diseñador ta cuadra cu Isabella su caracter y manera di ta. Nan a probecha y haci un dedicacion special na Isabella su mama y wela cu ta di nos isla ruman Bonaire, door di uza e renchinan di flamingo cu a duna e toke final na e trahe di gala, cu a wordo premia como 1 di e mihor shimisnan di e anochi. 

CAMPAÑA SOCIAL

Tocante e certamen Endy ta bisa cu mester duna Cesar loke ta di Cesar, y comision di Miss Youth Aruba a pone un show cu “waw-factor” di nivel hopi halto pa e 9 candidatanan, y tambe e publico presente y esunnan cu a sigui e transmision na Canal 22. For di e opening ya caba esunnan presente por a ripara cu ta un produccion den su totalidad, cu a wordo prepara te den detayenan lo wordo presenta. E candidatanan mes a disfruta di nan anochi riba escenario y esey ta importante pa e recuerdonan cu nan lo keda cu ne pa resto di nan bida. E ta felicita e comision completo cu un certamen hopi bunita hinca den otro cu cada aña ta creciendo den popularidad y calidad. Cu e logranan den e dos certamennan di beyesa, aworaki N-Designz lo kier pa tur 2 reina traha hunto riba un campaña social, unda nan lo duna bek na comunidad. Nan kier pa Ileyna y Isabella, como Aruba su maximo representantenan hubenil, traha hunto pa haci un diferencia y duna contenido na nan titulonan. Asina cu esaki wordo presenta na cada comision organisador y wordo aproba, nan lo anuncia kico esaki lo bira.

Isabella Benschop & Team N-Desingz a logra 10 Premio

1.      Miss Youth Aruba 2019

2.      Miss Youth Best Designer Dress

3.      Miss Youth Best makeup

4.      Miss Youth Zoom Aruba

5.      Miss Youth Amistad

6.      Miss Youth Mas Disciplina

7.      Miss Youth Best Smile

8.      Miss Youth Most Likes on Facebook

9.      Miss Youth Personalidad

10.     Miss Youth Popular (2x)