Shamira Clara tabata e ganadora di e competencia di FOCUS Instagram. Entre su premionan cu el a ricibi tabatin un Makover cu Roberto Avalo di The Salon, un photoshooting cu Suhaila Alders y un entrevista den FOCUS. Aunke e concurso tabata aña pasa na november, e reportahe a warda pa sali awor den e edicion di juli cu su ‘highlight’ ta Salud-Beyesa-Bienestar. Shamira a cuminsa practica deporte cu su15 aña. E tabata hunga futbol pa SV River Plate Aruba & SV Juventud Tanki Leendert, el a representa Aruba hungando defensa den seleccion femenino di futbol di Aruba. Banda di esey Shamira tambe tabata practica e deporte Kyokushin Karate, cu ta karate full body contact. Recientemente Shamira a logra obtene su Personal Trainer Certification na Canada, despues di a studia 3 luna intensivamente. Den Kyokushin Karate Shamira tabata invicto y na november di 2006, e mester a bay representa Aruba na Hapon, pero pa motibo personal, e no a bay. Despues di esaki el a cuminsa practica e deporte di fitness na Fitness Center di Divi Aruba Phoenix Beach Resort como algo recreativo y no competitivo.
Shamira ta guia y motiva un grupo di hende muher pa baha di peso y ta saludabel, unda tur comienzo di luna nan tin un sesion di grupo cu un dietista, pa duna consulta di nutricion. Esaki ta encera pisamento, midimento, pero mas importante ta haya conocemento di con pa come saludabel. Ta importante pa haya informacion y guia di nutricion di profesionalnan. Nan ta un grupo chikito di 8 hende muher cu ta train hunto 3 biaha pa siman. Un di e motibonan dicon e grupo ta limita na 8 dama ta, pa e por tin bon atencion na cada un di nan. E mester ta atento pa nan tin un bon postura, ora di haci e diferente movecionnan cu peso. Mainta trempan e ta yen di energia y e ta purba di contagia tur e damanan cu su energia di fitness. Motivacion positivo ta un energia contagioso. Lo bay tin dia cu bo no tin muchu gana pa haci ehercicio, p’esey e beneficio di ta den un grupo, cu tin mesun meta, nan lo duna bo smaak pa sigui pusha. Door cu e grupo ta chikito, e ta mas facil pa mi monitor y keda den contact tur siman pa mantene e motivacion y disciplina.
Shamira Clara den revista FOCUS ta mustra con pa haci ehercicio di ful curpa cu dumbbell na cas, den 3 set di cada ehercicio segun su instruccion. Locual cu bo mester ta 2 dumbbell y un mat di ehercicio.
