Un di e necesidadnan basico cu cualkier ser humano tin mester pa biba segun e 7 necesidadnan basico di Maslow ta alimentacion. Aunke cu esaki ta algo esencial (no solamente pa crecemento, desaroyo mental y pa nos sobrevivi) pa por lo menos 70 miyon persona rond di mundo esaki ta un relacion complica. Desorden di comemento tambe conoci como ‘eating disorders’ ta un problema mental cu tin diferente forma y tipo di desorden relaciona cu comemento. Un di desorden di comemento mas conoci na mundo ta Anorexia Nervosa y Bulimia. Den tempo recien e topico di comemento emocional (emotional eating) tambe a cuminsa bira popular y ta mas papia den medio social.
Comemento Emocional
Mientras algun persona ta bira afectivo na consumo di alcohol, droga, sex y otro forma of substancia pa asina “cope” cu cualkier emocion of sentimento negativo cu nan ta experenciando, otro ta ocupa nan mes cu comemento emocional. E personanan cu ta comedor emocional ta sinti e necesidad pa come, pa asina yena un bashi cu nan ta sinti. Algun factor cu ta causa esaki ta stress, ansiedad, depresion y e problemanan personal manera; problema di trabou, finanzas, relacion y autoestima abou. Ta yega na un cierto punto cu e comedor emocional no ta reconoce e diferencia mas entre hamber fisico (ora cu bo curpa ta rekeri y pidi alimentacion cual ta un proceso normal) y hamber emocional (ora cu fisicamente bo ta yen, pero mentalmente y emocionalmente ainda ta sinti e necesidad pa sigui come). Stress ta un di e causantenan di mas grandi encuanto comemento emocional, paso durante un periodo largo y intenso di stress, e nivelnan di cortisol cu e celebro ta produci, ta bay den desbalans y ta crea “cravings” constantemente.
Despues di un periodo largo cu di comemento emocional esaki por transforma den loke e Manual Diagnostico di Problemanan Mental (DSM-5) ta yama binge eating disorder y ta considera un problema mental cu ta rekeri ayudo psicologico y emocional, pa asina traha riba e origin di e problema y con pa resolve esaki.
‘Intermittent fasting’ of un desorden di comemento?
Na e otro banda di e spectrum caminda esnan ta emotional y binge eaters tin persona ta evita di come mas hopi posibel. Awendia tin diferente forma di dieta y metodo cu por auxilia den e proceso di baha peso. Loke ta importante pa tene na cuenta cu ne ta, cu e no ta suficiente pa simplemente yega un peso ideal, pero tambe pa biba un bida saludabel den e aspecto holistico. Intermittent fasting ta un metodo popular uza door di esnan cu ta desea di baha peso, pa medio di restringi nan mes di come pa un periodo di 12-14 ora pa dia. Den corto, e regla di dieta di intermittent fasting ta 16/8 cu ta insinua 16 ora sin come y 8 ora (reparti den un dia) pa come.
E diferencia entre yunamento y desorden manera Anorexia ta, cu den e metodo di yuna (fasting), e persona ta opta pa keda un cierto cantidad di ora sin come, cu e meta pa restringi e cantidad di cuminda cu e ta come pa dia. Un persona cu Anorexia ta desaroya un fobia di cuminda y ta haya un miedo pa consumi cualkier cuminda of likido como cu esaki ta crea e pensamento, cu e lo automaticamente subi di peso y pues bira gordo. Adicionalmente Anorexia, Bulimia, Binging y otro problema di comemento ta categorisa como problema serio mental emocional y medico, cu ta rekeri ayudo profesional.
Loke ta interesante pa sa ta, cu e personanan cu cierto tipo di personalidad, tin mas chens di desaroya un desorden di comemento y un gran parti di esaki ta por ehempel esunnan cu ta perfeccionista of tin un autoestima abou. Desafortunadamente hopi persona ta cay pa e standardnan irrealistico cu media ta pinta, tocante con un persona ideal mester mustra. Esaki ta crea un presion inmenso pa por yega na un imagen, cu no ta cuadra cu e realidad y ta crea no solamente un relacion complica cu cuminda y desorden di comemento, pero tambe complicacion cu salud, cu por hasta yega na morto.
Recuperacion y recurso pa ayudo
E caminda pa recuperacion di e problemanan cu comemento, specialmente pa baha peso, ta uno largo pero no imposibel. Un aspecto clave ta, pa siña reconoce, ki ora bo ta haciendo escogencia y e cambionan den bo dieta y estilo di bida, cu ta beneficia bo salud propio y na ki momento esaki por ta birando un problema di salud y desorden mental. Cada curpa y persona ta diferente, pues si bo tin deseo pa yega na un estilo di bida mas saludabel y baha algun kilo, ta esencial pa bo siña reconoce kico ta bo “triggers’ cu ta pone bo come di mas of no saludabel y scoge un plan di dieta cu ta apto y ideal pa bo. Finalmente ta importante pa e figuranan publico den e medionan social ta consciente di nan impacto y influencia cu nan accion- y escogencianan tin, riba esunnan cu ta sigui nan.
Skirbi pa Keyla Reeder
