Cada hende muher ta wak beyesa for di nan propio perspectiva, pero na final ta yega na un solo conclusion: cada hende muher ta un creacion unico di nos Creador. Con nan ta defini beyesa y con nan ta percura pa nan bienestar general diario of kico ta nan debilidad, ta varia. FOCUS a scoge 6 hende muher pa contesta 3 pregunta y ta comparti nan pensamento!
- Con abo ta defini beyesa femenino?
- Con bo ta percura pa bo bienestar general diario?
- Ki alimento ta bo debilidad y con bo ta anda cu esaki?
NATHALIA PEREZ
Manager Kate Spade Aruba
1. Pa mi beyesa femenino ta, cu tur hende ta bunita den nan mesun manera. Nos tur tin algo cu ta haci nos unico, stima bo mes prome cu tur cos. Semper trata bo prohimo, mescos cu abo kier pa nan trata bo; cu amor y humildad. Beyesa femenino ta bin mas di paden, cu di pafo.
2. Mi rutina diario ta lanta trempan gradici Dios pa un dia nobo, bebe mi koffie y prepara pa bay gym of haci ‘jogging’. Den transcurso di dia mi ta bebe hopi awa y come mas saludabel posibel. Mi ta purba mantene consistencia riba mi responsabilidadnan di mi debernan diario. Y keda positivo!
3. Mi debilidad den alimento ta cos dushi! Mi tin mane nan ta bisa un “ sweet tooth”. Con mi ta anda cu esaki? Mi ta purba di warda te den weekend, pa treat mi mes y keda den movemento cu mi trainingnan.
MELISSA GEERMAN
MoëtHennessy Portfolio Manager
1. Beyesa femenino pa mi ta, tanto e beyesa di paden y pafo, actitud y personalidad positivo.
2. Tempo pa mi mes tur dia ta importante, maske ta un rato, haciendo algo cu mi gusta of un sport. Ami mester ta bon, pa tur cos flui bon.
3. Mi no tin algo specifico cu ta mi debilidad, depende ki smaak mi tin na e momento y con mi ta sinti mi, mi lo satisface mi ‘craving’.
ANGELICA ROJAS
Store Manager Penha Plaza Daniel Leo/Counter Manager Parbel Aruba
1. Mi ta definie cu un solo palabra: seguridad! Pa mi seguridad ta hopi mas importante, cu loke sociedad ta impone cu ‘beyesa mester ta’ pa e muher. Seguridad di bo mes ta e beyesa, cu ta bin di interior y nos ta expres‘e.
2. Bibando conscientemente di e impacto cu e alimentonan tin den mi curpa y e accionnan di mi comportacion cu otro. Si ambos ta alinea, definitivamente nos por garantisa e bienestar diariamente. Un cos hopi importante ta, pa hiba un bida den balans, practicando un deporte, cu den mi caso ta coremento, cu ta mi mihor terapia.
3. Mi ta encanta bolo di chuculati, pero mi ta purba mas cu ta posibel, come esun di nutella, cu no tin hariña y ta gluten free. Sin lubida, cu e ta un stimulante natural di energia.
DIANA MOSHER HERRERA
Co-Propietaria Rejuvenate Spa
1. Hende muher ta bunita, no pa su beyesa exterior, pero door di su beyesa interior, su creencia-, balornan y su deseo di sirbi otro.
2. Mi ta purba medita, bebe hopi awa, mantene un alimentacion saludabel y bay gym. Mi tambe ta cuida mi cara y curpa na Rejuvenate Spa.
3. Mi ta un ‘food and cocktail lover’, pues den weekend mi ta’ indulge’ mi mes, pero mi ta pone un balans door di no come carbs durante siman y asina mi ta logra mantene mi peso.
CONNIE BURNLEY IRAUSQUIN
Personal Fashion Stylist/Image Consultant
1. Mi ta defini beyesa femeninio, un sweet personalidad, humildad, ta amabel, honesto, balentia y cu un bon curason pa yuda otro. Y pa tin e habilidad di eleva otro persona.
2. Mantene un diet balansa. Baha den consumo di sodium, sucu y e cumindanan procesa y vet. Yoga cu ta bon pa bo curpa y mente y tambe mi ta ‘jog’ 3 biaha pa siman. Tuma vitamina, bebe hopi awa, maneha stres y tuma tempo pa bo mes pa recarga.
3. Ta bon, cu mi no ta un gran amante di cos dushi… lucky ☺. Pero semper mi tin un debilidad pa french fries. Pero awor mi ta reemplaza esaki cu ‘sweet potatoes’ traha den un Air Fryer Oven.
ANA MARIA RAMIREZ
Brand Manager Procter & Gamble y Purina
1. Un hende muher cu ta sigur di su mes, den su curpa y su abilidadnan y no tin miedo di expresa su mes.
2. Sigura cu mi tin un curpa y mente saludabel. Mi ta logra esaki door di come bon, ta activio fisicamente y crea momentonan unda mi por libera mi mes di e stres di mi bida diario y refleha riba prioridad.
3. Mi no ta mire como debilidad, pero si momento di indulgencia. Mi ta come saludabel pero mi sa crea espacio pa por disfruta di e mundo culinario di Aruba, un Kobe beef Burger na Fusion of e classic crème brûlee di LG Smith’s Steak & Chop House sigur dificil pa resisti!
