E no ta un secreto cu e mundo di dating y relacion serio a cambia hopi den e ultimo decada. Diversidad den e parehanan di awendia ta varia hopi y tambe ta evidente entre otro orientacion sexual, cultura, religion, interes oposito y hasta diferencia di algun aña. Den e mundo di Hollywood tin hopi artista conoci, cu ta ehempel bibo di e relacionnan aki, manera; Solange Knowles y Alan Ferguson cu un diferencia di 23 aña, Sarah Paulson y Holland Taylor cu un diferencia di 32 aña, George Clooney y Amal Clooney cu un ‘age gap’ di 17 aña y tambe Michael Douglas hunto cu Catherine Zeta-Jones cu tin un diferencia di edad di 25 aña y ta casa pa mas cu 18 aña. Segun un estudio haci na Emory University na Atlanta a comproba cu mas grandi e diferencia di edad entre pareha ta, mas grandi e chens pa separacion ta.
Pero kico realmente ta pone cu algun persona ta scoge of opta, pa ta cu un persona mas mayor di edad? Tin hopi controversia entre e parehanan cu diferencia di edad, specialmente ora e homber ta esun cu ta mas grandi den edad y e muher mas hoben. Pa hopi persona, e ta bira dificil pa nan distingui si esaki ta algo normal, aceptabel y tambe legal. Mas cu claro ta importante pa tuma nota cu cada pareha, cu ta scoge pa ta cu otro, idealmente ta haci esaki bou di condicion y interes mutuo. Tambe ta tene na cuenta cu nan relacion ta legal, pues no cu un pareha ta sali of tene relacion, cu un persona cu ta menor di edad, segun e ley di e pais. Den edicion di FOCUS di e luna di augustus por lesa mas di e topico interesante aki.
