E business event anual di Deloitte tabatin e aña aki su toke special, unda durante su discurso e partner, Michael-Leo van Romondt, a informa cu desde prome di juni, Deloitte Dutch Caribbean a integra completamente cu Deloitte Netherlands. Esey kiermen cu Deloitte lo keda den e mercado di Caribe Hulandes y claro na Aruba, cu ta sigui ofrece nan servicionan. Actualmente nos ta bibando den un tempo hopi desafiante y e proceso cu Deloitte a pasa aden a tuma aproximadamente dos aña.
Mundialmente nos por mira hopi desaroyo pasando rond di nos, y tin cu ta sigui locual cu ya nan conoce, sin embargo nan a scoge un caminda diferente. Nan a bay pa un grupo mas grandi, pa sigura cu por sigui entrega y ofrece tur e servicionan cu Deloitte conoce y mantene disponibel pa Caribe Hulandes. E mas importante ta pa brinda e oportunidadnan pa e hendenan local y den henter Caribe Hulandes, pa persigui nan carera y pasa pa e siguiente nivel. Esaki ta algo cu nan ta buscando pa e isla di Aruba. Nos ta na un ‘crossroad’ na e momento aki cu nos economia y Deloitte a tuma e miho decision. Sea tuma e decision di permanece cu Deloitte of dicidi pa un di e otro opcionnan cu nos tur por tin den bida. Mescos nan ta kere cu ta aplica pa Aruba. E pregunta determinante si finalmente ta tuma e decision di bay e siguiente nivel, y nan a tuma e decision aki.
Despues di e discurso di Michael-Leo van Romondt, a continua e otro partner di Deloitte, Julian Lopez Ramirez, cu a elabora en corto riba e cambionan grandi despues di hopi inversion pa mehora e organisacion y e calidad di e servicionan. Cu e resultado cu no solamente Deloitte Netherlands sino tambe Deloitte North y Central Europe, a dicidi pa permanece cu Dutch Caribbean, specificamente Corsou y Aruba. Nan ta hopi contento cu e escogencia pa den e proximo añanan, inverti y crece e organisacion den Caribe Hulandes. Den cuadro di esaki nan tin un campaña special na e momentonan aki, cu ta dirigi na educacion ya cu nan ta sinti cu educacion y inclusion ta e parti mas importante di e desaroyo di un organisacion y di e país como tal. Señor Lopez Ramirez a finalisa gradiciendo y felicitando nan empleadonan na Caribe Hulandes, pasobra sin nan no por a haci e cambionan, y el a pidi un fuerte aplauso di tur esunnan presente. E anochi a sigui den un ambiente placentero den e hardin di House of Mosaic, cu entretenimento di Roxxa Nova y Mini N’Fusion unda tur e invitadonan a disfruta di otro evento exitoso di Deloitte Dutch Caribbean, pa di e manera aki gradici nan clientenan pa e confiansa deposita.
