E representantenan di Aruba Tourism Authority (A.T.A.) recientemente a participa na e IMEX America Show na Las Vegas-Merca. IMEX ta un di e exposicionnan mas grandi mundialmente cu ta cubri viahenan pa incentivo, reunion- y eventonan. E expo aki a conta cu presencia di e ekipo di Aruba Convention Bureau cual ta un departamento cu ta forma parti di Aruba Tourism Authority. E aña aki, IMEX America a atrae mas cu 13.500 participante di cual 3.400 ta cumprado invita di Norte America mas 68 otro pais. Ademas e evento a conta cu mas cu 3.500 exhibidor.
IMEX America a brinda e ekipo di A.T.A. cu oportunidadnan pa negoshi y networking di alta calidad den transcurso di e dianan di e evento. E ‘booth’ di Aruba a disfruta di un programa di cita completamente yen, cual a inclui organisadonan di reunion for di Norte America, Latino America y tambe for di Europa. A duna varios presentacion na gruponan di organisadonan international. Clientenan a ricibi un invitacion special pa pasa bishita e booth di Aruba unda a rifa varios estadia y actividad pa asina clientenan por cera conoci cu nos destinacion.
Trade shows manera esaki ta brinda A.T.A. e oportunidad pa conoce personanan di contacto y recursonan clave, pa asina promove nos producto Aruba como e isla ideal pa reunion-, viahe- di incentivo y eventonan di destinacion. Asina, A.T.A. a organisa un evento special pa clientenan VIP cu ta of tin potencial pa bende Aruba. Tambe a participa na eventonan di networking manera di MPI Foundation (Meeting Professionals International Foundation) cual mundialmente ta e asocacion di e industria di reunion- y eventonan mas grandi. Un bes mas e ekipo di Aruba a haci uzo di e oportunidad pa mustra Aruba su compromiso cu productonan sostenibel, door di uza cups di papel reciclabel en bez di boter di plastic cu awa.
