E lansamento na Aruba pa cera conoci cu e perfume nobo di Lancôme a tuma lugar na PENHA Aruba situa riba Plaza Daniel Leo. Un evento espectacular cu a representa e esencia di e fragancia, IDÔLE, cu su toke di elegancia y feminidad den e color rose gold como e dress code. E invitadonan a ricibi un trato VIP for di ora nan a yega, unda cu tabatin valet parking. E Plaza a haya un twist pa e anochi aki, unda cu Perfect Team Event Planners, a comberti esaki den un esfera elegante y festivo.
Pa e anochi special aki tabatin un lounge area special pa e invitadonan di revista FOCUS, unda nan por a sinta y combersa, mientras a sirbi nan un delicioso prosecco of biña. Tropical Bottling a crea e cocktail special, #WeAreTheFuture, manera e hashtag di IDÔLE, traha cu un receta exclusivo cu Bombay Gin. Cerca di e booth di e cocktail tabatin e DJ booth cu e DJ femenino, Xuxa Borges, cu a entretene cu su seleccion escogi special pa e evento. Un sorpresa tabata e presentacion di e grupo di baile, Energy Dance, cu a haci un show innovador di LED.
E invitadonan por a saca potret na e backdrop y na e 360 Photobooth di Elite, unda por a traha un video, cu ta graba 360 grado y despues den algun seconde ta hay’e den bo email. Hopi gusta tambe tabata e spiel cu e logo di IDÔLE pa saca selfie cu sigur tabata un highlight di e anochi.
Esaki tabata den harmonia cu e perfume cu su boter cu ta un di esnan di mas fini y ta manera un Smartphone, cu ta hacie super ‘instagrammer’, cu e sensacion cu bo ta sacando un selfie of boomerang. Sigur un anochi dibertido pa e lansamento di un perfume, cu ta e simbolo nobo di un generacion.
