Mayoria di nos tin un lugar faborito y e sicologo Finlandes, Kalevi Korpela, cu ta specialisa den estudio di e lugarnan faborito, ta bisa cu mayoria di persona ta uza e lugarnan aki pa mental- y emocionalmente restaura nan mes. E capacidad restaurador di e lugarnan faborito tin algun cualidad basico. (1) E lugarnan faborito ta elimina of aleha stress y e preocupacionnan cotidiano. (2) E lugarnan aki tin e caracteristicanan desea cu ta fascina nos personalmente. (3) Finalmente, nos necesidadnan emocional unico ta dirigi pa e aspectonan di e ambiente. Por ehempel, si nos ta desea paz y trankilidad, nos lugar faborito lo proporciona esaki. Si loke nos ta desea ta estimulo y emocion, e ora e caracteristicanan aki ta presente den nos lugar faborito. Den revista FOCUS di e luna aki tanto e maestra y fashionista, Swesdy Beeldsnijder, como e entrepreneur, Henna Thodé, ta habri porta di nan hogar y mustra e lugar faborito di nan cas.
Swesdy ta una persona apasiona, amigabel y creativo, y ta haya importante pa encontra semper ekilibrio den su bida diario. Swesdy ta un persona hopi colorido y ta combina semper e colornan cu un otro hende lo no combina asina facil. Hopi color ta dun’e energia y bida. Sinembargo cu su cas ta diferente… e mester duna descanso, manera un dia den naturalesa. Henna ta un persona cu tin un estilo elegante y clasico, cu su toke trendy den su vestuario. Cu un personalidad hopi subtil y agradabel, pa combersa y intercambia idea. Despues di un dia druk na su trabou, Henna kier yega su cas pa disfruta di e harmonia familiar hunto cu su tres yiunan. Un di e areanan preferi den su cas ta su sala, caminda nan ta pasa tempo hunto wak pelicula y snack cu su yiunan.
