Ta berdad cu ta existi cierto grado di bira bieu, cu nos no por evita. Pero nos por disminuie den gran parti, prestando atencion na e alimentonan, cu nos ta ingeri. Un alimentacion pober na nutriente, ta afecta e produccion di colageno y ta faborece e aparicion di linea fini riba cara. Por cuminsa alimenta di manera mas sano y bo no lo wak e efectonan solamente na bo peso of bienestar fisico, sino tambe bo cara. Consumi alimento fresco, manera; carni magro (sin vet), webo, fruta y berdura di blachi berde ta potencia e produccion di colageno. Sinembargo, tin otro alimento cu ta activa e procesonan inflamatorio na cuero y ta acelera e proceso di bira bieu. P’esey ta bon pa reduci e consumo di e 4 alimentonan aki:
Cos dushi y refresco
Desde pan blanco, pasando pa chuculati cu lechi, hasta un glas di bebida di refresco, cu bo ta bebe tur dia, reduci e consumo di tur loke tin gran cantidad di sucu. Exceso di sucu den organismo, no ta metabolisa pa e higra. Y e moleculanan di glucosa sobrante ta uni den algun proteina, cu den caso di cuero, e ta cera e colageno, cual ta daña e structura y elasticidad di cuero y ta faborece aparicion di plooi.
Alimento hasa
Segun WebMD, tur loke ta hasa den gran cantidad di azeta, ta provoca e procesonan inflamatorio di e celulanan di henter curpa y ta provoca aparicion di plooi na edad trempan. Ta importante pa evita e cumindanan cu tin vet trans of azeta vegetal hidrogenado.
Carni vet y procesa
Sauseshi, bacon y otro ta contene nivel halto di vet satura y di nitrato, dos ingrediente cu ta contribui na inflamacion di henter curpa, un proceso cu ta culmina cu e celula ta bira bieu. E clave aki ta pa opta pa carni cora magro (sin vet) of otro opcion, manera ‘breastchicken’.
Alcohol
E ultimo alimento di e lista ta uno, cu hopi hende ta consumi den exceso y ta un di e responsabelnan di mas grandi di desgaste di cuero y un di e composicionnan di mas agresivo, cu ta destrui bo cuero; alcohol! Cu exceso di alcohol, ta referi na dos glas pa dia of dies pa siman. Alcohol ta deshidrata bo cuero y ta priv’e di e nutrientenan, cu ta crea e aspecto di mas briyante y fresco.
