Na luna di November nos isla lo ricibi atletanan di diferente pais cu lo topa otro den e prome edicion di e Aruba International Karate Cup (AIKC2019). Un evento cu lo marca historia door cu esaki lo ta e prome biaha cu un torneo di e disciplina aki lo tuma lugar den e region di Caribe. Renaissance Convention Center lo ta e cede deportivo di e magno evento aki unda cu diasabra 16 y diadomingo 17 di november diferente ekipo procedente for di Spaña, Pakistan, Argelia, Venezuela y Panama (entre otro), lo competi den categorianan: Senior, Cadete, Junior y categoría Infantil.
E programacion di e Aruba International Karate Cup ta contempla, aparte di e competencia- y exhibicionnan, dos seminario cu e Karatekanan destaca: Douglas Brose (Brazil), dos biaha campeon mundial di Kumité, y Damian Quintero (Spaña) number dos na e ranking mundial di Kata. Esaki lo ta un excelente oportunidad pa nos deportistanan local por tin contacto directo cu e atletanan di taya mundial aki. Segun Angela Medina, PR di e competencia, cu e idea ta pa nan por comparti y por biba un experiencia cu lo motiva nan y cu nos hobennan por contagia di e motivacion, perseverancia y amor cu a converti e atletanan invita aki den loke nan ta awendia. Nan obhetivo cu e AIKC2019 ta pa duna un espacio di honor na e deporte di Karate den e region Caribe. Nan proposito ta pa converti Aruba den un parada obligatorio pa tur atleta di mundo den nan proceso tanto den desaroyo, como pa bira profesional.
E atletanan interesa pa participa por registra caba na www.arubakaratecup.com, mientras cu publico general cu lo desea di presencia e competencianan lo por haci esaki for di 9 or di mainta te cu 7 or di anochi, completamente gratis, riba tur dos dia.
