E tabata un di e faboritonan desde comienso, pero su mensahe poderoso di inclusion tabata loke finalmente a sigura Zozibini Tunzi, e corona di Miss Universe ayera nochi na Atlanta, Georgia. E ta bira e di tercer sudafricano cu ta gana e corona di Miss Universe. “Mi a crece den un mundo unda un muher cu ta parce mi, cu mi tipo di piel y mi tipo di cabey nunca ta wordo considera bunita, y mi ta kere cu ta ora cu esaki mester stop awe. Mi kier pa e muchanan mira mi y wak mi cara, y mi kier pa wak nan cara refleha den di mi”.
E pregunta na Tunzi y e dos otro finalistanan, Miss Puerto Rico y Miss Mexico, pa e host Steve Harvey tabata: “Ki ta lo mas importante cu nos mester siña e mucha muhernan awendia?”. E contesta di Tunzi: “Mi ta kere cu e mas importante cu nos mester siña e mucha muhernan jong ta liderazgo. E ta algo cu a falta e mucha muhernan jong y muhernan durante hopi tempo. No pasobra nos no kier, sino pa loke e sociedad a califica e muher pa ser. Mi ta kere cu nos ta e sernan di mas poderoso na mundo y cu nos mester tin tur e oportunidadnan. Esaki ta loke cu nos mester siña e hobennan aki. Pa tuma espacio. Nada ta asina importante manera ocupa espacio den e sociedad y sigura bo mes”.
Ken ta Zozibini Tunzi? El a nace na Tsolo, un ciudad na Eastern Cape South Africa, den un famia di educadornan: su mama ta director di un scol y su tata ta traha na e Department of Higher Education and Training na Pretoria. E ta di dos di tres ruman muher. Tunzi ta un Public Relations Officer, gradua na Cape Peninsula University of Technology na Cape Town.
E curiosidadnan di concurso di beyesa: Tunzi, di 26 aña, a participa den e concurso di Miss South Africa na 2017 y el a yega den e semifinalistanan. Sin renuncia facilmente, el a duna su mes un otro oportunidad e aña aki y el a gana. Un mensahe importante: Tunzi tabata uza activamente su plataforma pa papia riba violencia di genero. Prome cu e concurso Miss Universe, el a asocia den un campaña como Miss South Africa cu UN organisation HeForShe. Incluso su trahe nacional, cu a ricibi critica mixto online, tabatin un mensahe. Yama The Wave of Love, e trahe diseña pa Llyod Kandlin, tabata dorna den e colornan di e bandera nacional. Cada cinta tabata contene cartanan di amor di sudafricanonan prometiendo su apoyo na e muhernan sudafricano den e lucha contra violencia di genero. “E campaña ta destina pa bon y e comentarionan positivo tabata mi enfoke principal. Mi ta aprecia cada mensahe di apoyo ”, Tunzi a bisa prome cu el a sali pa bay Atlanta.
Tunzi a vence 89 concursante di rond mundo den e di 68 edicion di Miss Universe, cu a tuma lugar den Tyler Perry Studios . Dos faborito prome cu e competencia, Miss Thailand, Paweensuda Saetan-Drouin y Miss Filipinas Gazini Ganados, no a logra drenta den e 10 finalistanan. E Filipina Catriona Gray, cu a entrega e corona na Tunzi, a bay cu su corona di Miss Universo 2018. Cu su victoria, Tunzi ta bira e tercer reina di beyesa di South Africa cu ta gana e corona: e prome tabata Margaret Gardiner na 1978 y Demi-Leigh Nel-Peters na 2017. Tunzi ta e prome sudafricana color scur cu ta gana e corona di Miss Universe.
