Un noticia tristo pa e gran fanaticada di e cantante di e grupo sueco Roxette, Marie Fredriksson, cu a fayece na edad di 61 aña despues di a lucha contra un tumor cerebral cu a wordo diagnostica na 2002. “Cu gran tristesa nos tin cu anuncia cu un di nos artistanan mas grandi y keri a fayece. Marie Fredriksson riba e mainta di 9 di december”, a wordo anuncia a traves di un comunicado pa Marie Dimberg, responsabel di prensa di e grupo.
E cantante ta famoso pa interpreta temanan manera “Listen to your heart”, “It must have been love”, cancion cu a forma parti di pelicula “Pretty Woman” cu Richard Gere y Julia Roberts. E tumor cerebral a oblig’e pa somete na un tratamento agresivo y door di su spirito luchador, e cantante por a bolbe gradualmente riba escenario desde 2009. E banda a saca varios produccion y bay riba varios tour, pero na 2016 e dokternan a recomenda e cantante pa bandona escencario y dedica na su salud. Fredriksson ta laga atras su casa y dos yiu.
Riba e instagram di Roxette nan a post un imagen unda ta aparece e nomber di e cantante y su aña di nacemento y fayecimento. Riba Twitter di Per Gessle, e otro mitar di Roxette tambe ta lamenta e fayecimento di e cantante: “Tempo ta pasa asina rapido. No asina tanto tempo pasa cu nos ta pasa dia y anochi den mi apartamento chikito compartiendo soñonan imposible. Y ki soñonan nos a yega di comparti! Mi ta sinti honra di por a conoce bo talento y generosidad. Tur mi amor ta bay pa bo y famia. E cosnan nunca mas por ta mescos”.
