E compania di aerolinea AVIANCA a celebra dia 5 di december mundialmente nan 100 aña di existencia cual por cierto por wordo admira e aña aki entre otro cu un avion retro cu ta bula for di Colombia pa varios destinacion globalmente. Avianca a inicia su operacionnan pa Aruba na aña 1983 cu un alrededor di 6.000 pasahero pa aña. Tabatin diferente iterinario bulando pa Aruba entre otro Bogota-Baranquilla-Aruba. Durante añanan nobenta cu e apoyo di Avianca, Aruba a habri su portanan pa otro mercadonan di Latino America entre otro Peru, Ecuador, Argentina y Brasil.
Na Aruba, den presencia di invitadonan, e celebracion di 100 aña di existencia a tuma lugar diamars dia 10 di december. Prome Minister Evelyn Wever-Croes a habri e evento cu palabranan di elogio pa AVIANCA, como tambe Pammela Flores – Regional Sales Coordinator di Avianca Centro America y Caribe y Joost Meijs – CEO di Aruba Airport Authority. Ronella Tjin Asjoe-Croes – CEO di Aruba Tourism Authority a hiba palabra durante e apertura, na unda el a elabora riba e importancia di e buelonan di Avianca pa Aruba cu ya ta bulando pa mas cu 36 aña pa nos destinacion. E aerolinea ta contecta no solamente Colombia pero e region di Latino America cu nos isla.
Na final di su speech, CEO di A.T.A. Ronella Tjin Asjoe-Croes a ofrece Pammela Flores un bunita obsekio di parti di Aruba Tourism Authority, gradiciendo Avianca y alabes deseando nan hopi exito pa e añanan binidero.
